15
Absender: Nesen, Wilhelm
Empfänger: Zwingli
Ort: Basel
Datierung: 8 V (1516)
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 39-40
--39--
Guilielmus Nesenus magistro Vdalrico Zvingli S. D. P.
Epistolam tuam admodum elegantem reddidit mihi Conradus
Fontanus, utrique nostrum amicus atque bonis litteris et consilio
instructissimus. In qua mihi, idque adeo uni, culpam hanc obtrudere
conaris, aliquot ex Cyrillo paginas defluxisse. Cum etiam quamvis
citius fraudem agnoscerem, modo ne huius me suggillares, ego continuo
lectis tuis literis adeo suavibus bibliopolam adii, Cyrillos deprompsi
multos, exque iis multis unum non plane integrum converri. Nam duas paginas
aliquamdiu desiderabis, quas fide certe Germanica, quamprimum
ex Lutecia advectę fuerint, ad te mittam. Preterea Maximilianus
--40--
Venetos bello prohibuit, quo minus libros suos Franchfordiam
usque perferrent. Quare et hanc etiam bibliothecę tuę, alioqui haudquaquam
violandę autoritatis scriptoribus refertissimę, calamitatem boni
consule
Beatus Rhenanus plurimum te salvere iubet, vir talis, ut
numero dicam, qualem vix alterum nostra habet Germania.
Vale.
Raptim Basileę octavo eidus Maii.
De testamento item et de ceteris ex Glareani literis cognosces [!]
licebit.
Vale iterum et salve, Uldarice optime, et scias, illum esse Nesenum,
de quo tu omnia tibi polliceri potes.
Ornatissimo viro magistro Huldericho Zvingli, Glaronę
ecclesię parocho. - Glaris.