158

<< Nr. 157 | Index | Nr. 159 >>

Absender: Fabri, Johannes

Empfänger: Zwingli

Ort: Konstanz
Datierung: 18 X 1520

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 357

--357--

Huldarico Zuinglio Ioannes Faber S. D.
Nunquam in animum venit, ut in hoc tam foelici, imo aureo seculo
aliquam studii mei foeturam emitterem, non ignorans delicatissimis
stomachis cruda placere non posse. Quod si inter venandum quiddam,
quod oblectaret, quandoque deprehenderem, mecum ita semper statui,
intra meos parietes, imo in sinu meo fovere velim. Sed vide, virorum
optime, quo me ignavum hominem traxerit amicorum importuna petitio.
Mundo aequidem toti ridendus prodii. Consultius fuisset, ut ingenue
fatear, nenias hasce meas sepelire vivas aut tradere Vulcano, quam
sic cum iactura nominis inter obscuros numerari, quanquam et prodesse
cupiam. Si tu ac tui similes, quibus est eruditio rerum istarum
maxima, non aequo animo susceperitis, iam de Fabro actum erit. At
satis superque lucratus fuero, si ad rectam concionandi provinciam
doctioribus ansam prebuero. Inter eos ut tu primas partes suscipias,
aequissimum erit.
Vale, et ex opusculis unum tibi pro munere mitto; reliqua pro
viginti crucigeris aut minori precio divendas, rogo.
Ex Constantia, quintadecima Kalendas Novembres anno salutis
nostre M.D.XX.
Utriusque liguae doctissimo Huldarico Zuinglio, Tuguricensis [!]
gregis pastori vigilantissimo, amico non vulgari.