174

<< Nr. 173 | Index | Nr. 175 >>

Absender: Wirz, Burkhardt

Empfänger: Zwingli

Ort: Basel
Datierung: 12 III 1521

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 441-442

--441--

Burchardus Wircius Vlricho Zuinglio suo S. D.
Ecce, ut nugigerulus hic iterum te nugis meis obtusum veniat
Quin tu huic semel iubes, ut una cum istis nugis abeat, quo dignus sit.
Atqui sat scio, te non in nugigerulum hunc culpam, sed potius in me
puerum tam temerarium, tam audaculum collaturum, ut qui ausim,
imo quem non pudeat te, virum occupatissimum, interpellare nugasque
obtrudere nugacissimas. Sed quid facias puero de te bene mereri
studenti? Silentium impones? Sic nec bene de te nec male mereri
potest. Aut non respondebis? Ne sic quidem fortasse valde bene de
te merebitur, cum nesciat, an gratum faciat tibi, viro tanto, tam munere
(quo fungeris honestissime) euangelico occupato. Age, mi
Zuingli, per pueriles nugas meas studium tuum pertinax nequaquam

--442--

impediri debet; quin potius, si scirem, studio tuo vel minimam horę
partem per me et meas hasce detrahi nugas, tacerem perpetuo. Etenim
apud me non minimi commissi loco habetur studia alicuius, praecipue
sacra, impedire ac morari. Exemplum cepi a Iacobo, praeceptore
meo mihi charissimo, qui citius, quam a studiis impediri
pateretur, pugnis bene cedi praeoptarit; adeo sacra res illi studium,
adeo rursum ab illo retrahi detinerique peccatum esse videtur. Sed
iam mihi videre videor, ut satis obtuderim te mihi benignissime auscultantem.
Iccirco epistolium meum puerile hoc claudam modo, ut exoratum
te velim, ne, si forte vel in hoc vel in prioribus peccaverim
epistoliis, id mihi vitio vertas, sed potius pueritiae atque ignorantiae
meę tribuas.
Vale.
Basileę die sancti Gregorii anno a nato Christo millesimo
quingentesimo vigesimo primo, aetatis vero meę anno decimo quarto.
Vale.
Saluta nomine meo parentes meos iisque me commenda.
An den hochgelerten unnd witberuempten herrn, her Uolrich Zwinglin,
sinen gnädigen herren unnd guotten fründ. Zürich.