185

<< Nr. 184 | Index | Nr. 186 >>

Absender: Capito, Wolfgang

Empfänger: Zwingli

Ort: Halle
Datierung: 4 VIII 1521

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 465-466

--465--

S. D. Memoria tui maiorem in modum me solatur, ubi tam varias
perturbationes videro exortas praetextu fidei. Nam ex animo es inter
raros Christianus, nescius fuci. Nihil hic audis, nisi furias utrinque.
Reverendissimus cardinalis Moguntinus, quantum potest, euangelium
praedicent, praecipit, citra perturbationem vulgi synceriter absque tam
atrocibus affectibus, nec vult, ut quisquam clamet in Lutherum.
Nuper venit provincialis ordinis Minorum, instructus magna autoritate,
petiit auxilium, ut dicebat, principis mei et literas, ut possit concionari
per dioceses contra Lutherum. Quid ad hęc princeps meus?
Cordatissime respondit sibi non probari huiusmodi institutum, non
esse sic mutuis convitiis debacchandum, neque eam sibi viam ad tranquillitatem
videri; gratum tamen admodum ipsi, si firmarent pure et
simpliciter dicere euangelicam veritatem, citra atrocem notationem;
suapte sponte veritatis luci cessuras tenebras erroris; nichil se prius
in votis ducere, quam audire, qui synceram Christi imaginem inculcarent,

--466--

alieni ab impudentia fratrali plusquam cinica. Id verbi tamen
ego adieceram approbante principe. Cęterum, diversificantur discindunturque
varias in partes asseclę Lutheri. Novum sophistices genus
invehunt, omnia partim rapiunt ad questiones, ad contentiones verborum,
partim ad furiosos affectus, praesertim fratres, quo consequuntur,
ut bona pars vulgi eos aversetur, et monachis barbarioribus frequentius
operam dant. Metuunt etiam suę tyrannidi quidam ex proceribus,
postquam viderint, undique conspirare et quiritari multitudinem. O
inconsultam temeritatem, o acerbam pietatem! Adde, quod acutissime
ex Celso et aliis rimentur, quę ad calumniam Christi torqueri valeant.
Tu perge, mi Zingli, tuo more; syncere dicas et lenitate summa,
qua Christus de mundo splendide triumphavit. Cessi officium concionatoris,
forte haud paulum occupatior, quam olim: tot curis undique
distringor. Est omnino ordo aliquis servandus civitatis Christianę;
emendandi mores recepti, non subvertendi. Dissui, non rescindi potest
antiqua consuetudo. Hęc ocissime. Nam libuit in sinum amici profundere
nugas. Utinam coram daretur! quam prolixe te acciperem
Vale.
4. Augusti Hallis, oppido Saxonię, ex arce Magdenburgensi.
Anno rrj.
Vlricho Zvinglio, theologo integerrimo, curato Turegii
apud Helvetios, domino et amico suo observandissimo. -
Zirch in Schweitz.