188

<< Nr. 187 | Index | Nr. 189 >>

Absender: Zwingli

Empfänger: Rhenanus, Beatus

Ort: Zürich
Datierung: 8 IX 1521

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 472-473

--472--

Beato Rhenano S.
Dono misit mihi superioribus diebus Ioannes Frobenius
Hutteni "Querimoniam", hominem apostolicam [!] (homo enim bulla
est), "Eccium dedolatum" et cuiusdam lascivientis vituli (Itali)
in Lutherum non tam scripta quam maledicta, et vanas quasdam
nęnias; quem supra modum miror, quisnam sit hominumve deorumve,
nisi, quantum ex oratione colligo, Juppiter est, qui reliquos
deos omneis domi desidere cogit, ultra inferos abiecturus, qui mutire
ausint. Ipse interim solus in throno maiestatis caput quatiens et κίδεϊ
γαίων fulgurat, tonat, omnia miscet. Tantopere visus est mihi

--473--

κομποφακελο [ρ] ρήμων iste insolescere, quantopere vix aliquis. Nam
haud satis illi est Luterum convitiis aspergere, nisi et Germanis
sese offerat ὁδιγόν [!] per Luterum seductis, scilicet pollicens ad
λεοφόρον [!] reducturum, modo sibi illi obtemperent. Quid plura?
ita putat Lutherum per ignorantiam authorum, quos ipse colit, hallucinatum,
ut nullam rem illi magis obiiciat, qum tamen in hac arena
non modo non cederet, sed facessere cogeret. At cedendum est aliquantisper
Italico supercilio et fastui, qui nunquam non in sinu sibi
canunt τόσσον ἐγὼ περί τ̓ εἰμὶ θεῶν, περί τ̓ εἶμ̓ [!] ἀνθρώπων dolet
illis Germaniam se doctiorem fieri. Quamquam et Germanum
quendam te celare non possum (eum, cui Sanderus amicus noster
invidebat librum quendam Erasmicum a Frobenio dedicatum, cui
per me respondisti autoritati primum non nihil datum, deinde factum,
ut hac potissimum via ad nostras, hoc est ad Christi partes traheretur,
quamquam σταυροφόρος noluerit unquam vel digitum latum a
Scoticis σκόιεσι recedere; tenes, scio, rem), qui, cum nuper Tiguri
nobiscum esset, gratulabundus recensebat, Italum quendam tersissime
et doctissime Luterana omnia aut evertisse aut infirmasse. Sed nihil
neque fidei neque frontis cum nos videret habere sibi, desiit tandem
vulgi mancipium et futilis aurę strepere. Ac dum hunc libellum in
manus capio, primo intutu video, quod res est, eum esse, quem ille
canebat. Narra itaque, si quid habes, numnam Luterus sit se ab
eo vindicaturus, nam hoc facile fuerit, quandoquidem leviter iste sua
firmat, anne doctorum aliquis cętus illum picturus sit, ut λαῖον istum
dedolaverunt.
Vale et omnia boni consule.
Tiguri die nativitatis XXI.
Huldericus Zuinglus.
Doctissimo viro Beato Rhenano, vere Christiano,
fratri carissimo. - Gen Basel.