191
<< Nr. 190 | Index | Nr. 192 >>
Absender: Wickgram, Petrus
Empfänger: Zwingli
Ort: Strassburg
Datierung: 10 IX 1521
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 478-479
--478--
Si vales gaudeo; at ego capitis doloribus et gravedine ad multos
iam dies usque adeo crucior, ut divini verbi concionis provinciam
humeris subire nequiens per alium providere coactus sim, quo nomine
de his [neque] rebus, de guibus olim, dum in Thermis mutuo fruebamur
colloquio, commentaremur, tibi hactenus satisfacere nequivi.
Consolationes itaque tuas anime mee procul dubio recreativas expecto,
quandoquidem te verum Israelitam [cf. Joh. 1. 48], verum Christiani
doctoris exemplar, veram divini verbi buccinam censendum duxi; utroque
nempe tum prophetie tum doctrine dono clarus verbo et opere
doces. Tales iam pridem in his seculi finibus omni nulla [non] viciorum
labe inquinatis pastores et euangelii precones audire desideravi, e
quibus verum divini verbi panem, non anilium fabularum [cf. 1. Tim.
4. 7] furfures, oves Christi prestolarentur. Non his tibi assentari
velim, verum calcar adiicere, ne inceptis desistas, minas tibi creditas
olim deo multo cum fenore redditurus [cf. Luc. 19. 12 ff.]. Nec te
sanguinariorum tyrannorum, quibus ius et fas, ymo deus ipse venales
sunt, terreant, quo minus veritatem domini annuncies. Ferent confestim
--479--
confusionem. Dissipabit quoque consilia illorum deus [Jes.
19. 3]. Non est Abel, quem Caini malicia non persequatur. Quid
contra me unus ex vestris civibus attentaverit, qua gratitudine beneficiis
per me in suos collatis responderit, ex magistro Luca (ni
fallor) audivisti; puerum namque illius biennio ferme in edibus meis
a mensa fovi, vestivi, pro iure preceptoris satisfeci, nihil recompense
inde a suis repetens; verum malicia eundem puerum instigante, dum
posthabitis literis omni nequicie deditus, me inscio, vagaretur, culpam
pessime indolis mihi immeritissimo imponere student, minis etiam
quibusdam adiunctis; dissimulavit tamen dominus Ioannes Heinricus
Goldlin omnem rancorem, me in procuratorem suum irrevocabilem
constituens, iuramento etiam de non revocando facto testibus et notario
presentibus; nunc tamen ubi XXX aureis me emunxit, beneficiolum
mihi promissum alteri tradere aut resignare conatur. Dedi preterea
domino Heinrico Goldlin LXX aureos mutuo, pro quibus se
sub camere penis obligavit; quos ubi repeto, praeter convicia et iniurias
recipio nihil. Fac igitur, vir optime, rebus meis adsis, huic quoque
nuncio prudenti consilio assistas, Petrum tuum vicissim votis tuis
habiturus paratissimum. Me quoque reverendo ac generoso domino
de Geroltzeck commendabis, magistro Luce plurimum salutis meo
nomine impertiturus, cui pro beneficiis in me collatis parem vel maiorem
benevolentiam exhibere studebo. Tumultuario.
Argentine decima die Novembris anno dominice nativitatis
xrvcxxj.
Petrus Wickgram, concionator Argentinensis, tibi deditus.
Christianae theologiae docto humanissimo viro magistro
Uodalrico Zingly, plebeiano in Zwrch [!] amico suo carissimo.