21
Absender: Glarean
Empfänger: Zwingli
Ort: Basel
Datierung: 13 XII 1516
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 51-52
--51--
Ulderico Zinlio, Doggio, viro philosopho et theologo,
Glareanus S.
Nescio qua naturae malicia, charissime Ulderice, omneis hoc
habeamus: iuvenes insanimus, senes delyramus. Insanivi et ego meam,
quam vides, insaniam, idque strenue, non tamen, ut puto, prorsus inconsulto.
Quippe cum videam omneis, quotquot elegias scripserunt,
obscoenam lasciviam carminibus tanquam quid necessarii ac huic generi
particulare inseruisse, aut quod id aliter non posse fieri ostendere
voluerint, aut quod - libentius crediderim - carmen multis non
placiturum, si huiusmodi illecebrae non adessent, pertimuerint, quod
Martialis de suis epigrammatis saepe conquestus est, si forte ipse non
idem facerem, ne insanire me dicat quispiam, vehementer timui. Sed
longe alia mihi ratio in conscribendis elegiis fuit. Nam praeterquam
quod vita mea omnis a lascivia cavit, hoc quoque consilium meum
absterruit, omne scilicet meum tempus omnemque laborem huc pertinere,
ut prosim potius, quam delectem. Duos igitur libros elegiarum
institui: priorem, qui sit πανηγυρικός, quippe in qua laude dignos extuli,
--52--
alter διδασκαλικός, videlicet in quo optimae indolis iuvenes ad virtutes
et praecipue ad pudicitiam adhortatus sum, id quod potissimum hominis
Christiani puto, quanquam multi poetae nostrae aetatis gentileis
non solum omni turpitudine imitati sunt, sed (quod absque dolore
meminisse non valeo) pene superarunt; adeo quosdam magis iuvat esse
Catullianos Propertianosque quam vel Paulinos vel Christianos.
Accipe igitur, mi charissime Ulderice, libellos hosce meos, praecipitatos
potius quam editos; abieci enim eos, ne in periculo apud me
solum essent, emendaturus suo tempore, ad quae nunc lubens conniveo.
Postremo hoc unum tibi persuasum habe te mihi ex animo charum,
idque tuo merito. Sed non est opus eum commendare, quem multiiuga
disciplina cum multiiuga virtute satis commendat.
Bene vale.
Basileae ex Lacydio nostro an. Christi M.D.XVI. ad Idus
Decembreis.
DVO ELEGIARVM LIBRI || HENRICI GLAREANI ||
HELVETII AD || VLDERI - || CVM || ZINLIVM ||
DOGGIVM. || (Am Schlub Seite 42:) BASILEAE IN AEDIBUS
IOANNIS || Frobenij Hammelburgensis diligen - || tissimi
apud Alemannos || Chalcographi, || expensis || autem ||
Gertrudæ || Lachneræ uxoris || Frobenii. Anno domini ||
M.D.XVI. Decimooctauo || Calendas Decembreis. ||
Dann Druckerzeichen Johannes Frobens.