210

<< Nr. 209 | Index | Nr. 211 >>

Absender: Hummelberg, Michael

Empfänger: Zwingli

Ort: Konstanz
Datierung: 27 V 1522

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 524-525

--524--

IS † XS
Gratiam et pacem dei et domini nostri Ihesu Christi. Non
nova est isthaec erga te benevolentia mea, optime Huldriche. Olim
iam mihi carus es. Et si de facie ignotus, ex animi tamen imagine
et candore mihi es notissimus. Tam singulares animi tui dotes sunt:
καὶ θεῖα τοῦ πνεύματος χαρίσματα, ut ab optimis quibusque passim
ebuccinentur, atque id agitante ipso illo spiritu, qui neminem diutius
latere patitur, quam pietati conduxerit. Foeliciter ad nos igitur etiam
ultra Acronium lacum dissitos tui nominis et synceritatis fama penetravit,
non alia caussa, opinor, quam ut tui exemplo ἐν ὀρθῇ πίστει καὶ
πνευματικῇ ἐλευθερίᾳ atque adeo in euangelio Ihesu Christi constanter
perduremus nec sinamus τὰ τῶν ἐχιδνῶν γεννήματα [cf. Luc. 3. 7] nos
a recta fugare, nempe a Christo, qui unica nostra est via et veritas
et vita. Contra quem eiusque fidei veros adsertores nec inferorum portae
praevalebunt [cf. Matth. 16. 18], ut interim insaniant et rumpantur
ἀσεβεῖς σοφισταί, togati vulturii et mitrati arietes. Nec possum aliter
adpellare magistros istos, qui hominum doctrinas praeferunt doctrinae
dei et pro scriptura, idest euangelica veritate, somnia et nugas scholarum
crepant, propter ambitionem, avariciam et luxum omnia confundentes,
ante homines caelorum regnum occludentes, nec tamen ipsi introeuntes
nec alios intrare permittentes [cf. Matth. 23. 13]. Φεῦ κακὴ
τύχη τῶν καθ̓ ἡμᾶς. Candidissimos viros et amicos etiam nostros

--525--

Fabricium, Engelhardum et Utingerum plurimum salvere iubeo.
Σὺ δὲ τὸν ῾Υμελβέργιον, ὃν ἄρτι μὲν ἤρξω φιλεῖν, μὴ ἀποβάλλου, φίλος
δ̓ ἅπαξ γινόμενος πειρῶ διαμένειν, καὶ περὶ ἐμὲ τοιοῦτος, οἷος καὶ περὶ
τοὺς φιλτάτους.
Vale in Christo Ihesu quam felicissime.
Constantię VI. Kalendas Iunias M.D.XXII.
Tuus quidquid est
Michaël Humelbergius Ravenspurgensis.
Iuxta pio ac erudito viro domino Huldricho Zuinglio,
Tigurinorum euangelistae, domino et amico meo singulari salutem.
Zuo Zürich.