226

<< Nr. 225 | Index | Nr. 227 >> 

Absender: Müller, Jodocus

Empfänger: Zwingli

Ort: (Cham)
Datierung: 16 VIII 1522

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 559-560

--559--

Cogitanti mihi, quo viatico deducere possem hunc Bernardinum,
qui has ad te defert litterulas, tu solus occurrebas omnium
patronus sane quam sollers, cui et me et illum committerem. Fuit
mihi cooperarius satis superque fidus, ut non solum domi meę, verum
etiam foris par illi fuerit accommodare se moribus aliorum plane integris.
Ea quippe in illo sita est modestia, quod iniuria affectus a
quovis, etiam sordidissimo homuntione, haud pili faciat. Quem, si
dabitur copia, tibi commendatum iri non ab re fuerit; iustę huic meę
postulationi annuas. Quod si nec fata sinant, ut illum assumas in
tuum contubernium, fac, precor, humanissime vir, ut tua interpellatione

--560--

magister Conradus in Küsnacht, spectatę fidei alumnus, si commode
possit et vacet, suo prosequatur favore amicis admodum iucundo
ac curam illius agat propensiorem in miserę sortis casus adactos [!]
Tantus est profecto in illo studii fervor in bonas literas, quod insumpti
laboris ac impendii tedeat nihil, qui cupiat doceri a summę eruditionis
pręceptoribus, quo evadat emunctior ad rem divinam capessendam, cui
praeter cęteros apud nos vigilantior incubuit. Tu quidem nosti, quantum
veritas male audiat apud ingratos, et quid morosi obganniant
senes, quo iuvenum abducant animos ab euangelicę doctrinę viridariis
et a verę pietatis fontibus, ipsi interim turbulentis involuti lacunis.
Qui neque sibiipsis temperant, quin accersiant [!] ignobile vulgus in
odium cuiuscunque addictissimi in legem Christi. Is porro in nos
concitatus est tumultus ab Erynne quadam furiis agitata, non parum
nobis infesta, quatenus in tuto collocare pedem vix ulli sit concessum,
qui non maleferiatis operam navet autoribus. At operę pretium est
ea via transigi vitam hominum, quam et dux noster ac servator Iesus
ingressus est. "Non est in medico semper, relevetur ut ęger. Interdum
docta plus valet arte malum". Abeant igitur ac suo pereant
flagitio. Ferenda sunt hęc a pertinacibus pię factionis. Deus ille
noster optimus maximus provideat sibi de meliore sęculo, quo perditissimi
explodantur ventres a coetu Christianorum. A morsibus
canum nos eruat, qui vere panis est, qui et e cęlo descendit.
Interim vale et me ama vicissim, ut ea tibi innata est benevolentia.
Datę sunt XVII. Calendas Septembris anno M.D.XXII.
Iodocus Müller, plebeianus in Chamm, moriger tibi
clientulus, quoad vivit.
Viro litteratura ac morum dignitate longe praestantissimo
Hulderico Zuinglio, praeceptori suo quam integerrimo.