239

<< Nr. 238 | Index | Nr. 240 >> 

Absender: Macrinus, Melchior

Empfänger: Zwingli

Ort: Solothurn
Datierung: 30 IX 1522

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 589-590

--589--

S. D. Si eos, quos nunquam vidimus, ob studium philosophiae
eximium aut artem aliquam humano ingenio repertam diligimus, quanto
iustius illos amabimus, qui nobis Christianam atque adeo euangelicam
philosophiam, nostrae salutis ᾱ καὶ ω̄, ex altissimis tenebris restituunt,
inter quos tu, φίλτατε Huldriche, tanquam heros ac κορυφαῖος, spiritu
Christiano homine plane digno progrederis teque propugnatorem euangelicae
veritatis intrepide, tanquam murum ac vallum firmissimum, offers,
pro quo dignam mercedem ab ipso deo relaturus, cuius laboriosissimam
vineam excolis et oves ad immortalia pascua reducis errantes; quae
utinam reduces olim ad suum caput, quod Christus est, redeant.
Quod quidem tuum in nos omnesque Christi fideles beneficium quia
amplius dissimulare nequivimus, pro nostra virili gratias agere et, et
si aliud non possumus, gratum erga te animum declarare voluimus,
quem, satis scio, quae tua est humanitas, non spernes. Nam etsi eruditionis

--590--

ac ingenii in nobis nihil sit, studium tamen et genius noster
impense doctis delectatur et tuis ac tuorum similium scriptis mire
demulcetur, quae hactenus diligenter et, ut spero, haudquaquam sine
fructu legimus, lecturique subinde, sicubi offerantur. Haec sunt, inquam,
quae tranquillum, quietum ac sibi constantem animum efficiunt
neque humanorum studiorum more in diversa rapiunt. Etsi in rectioribus
studiis philosophandum nemo neget, at, ut Socrates inquit,
non ultra aetatem atque, ut proverbium habet, μηδὲν ἄγαν. Haec
autem ideo ingero, quod paulo ante impensius utriusque linguae studiis
(quam feliciter, nescio) addictus eram, nunc vero tuo ac tui similium,
hoc est eruditorum, beneficio ad euangelica me converti, in quibus,
ut prius in Latinis Graecisque, Rudolphi Collini, iuvenis nunquam
satis laudati, auxilio utor, apud quem paulo ante cum essem, tua in
Homeri "Iliada" scholia reperi. Is cum doctrinam ac eruditionem
tuam omnifariam, mihi nonnihil ex scriptis tuis cognitam, insigniter ac
merito laudaret, tum et humanitatem praedicaret singularem, ita me
tui studio accendit, ut non censuerim, mihi diutius cunctandum, quin
ilico ad te scriberem. Esto igitur hoc amoris in te mei μνημόσυνον,
quod, si non doctum, certe tamen amicum et synceri animi fidum
testimonium. Porro sunt et hic Christiani aliquot, qui te salvum
optant, inter quos est hic tabellarius, concivis tuus, homo mehercle
candidus ac studiosus. Caeterum praeter huncce et alios quatuor
οἰδὲν ὑγιὲς apud nos est.
Vale et me redama.
Datae Salodori pridie Calendas Octobris anno 1522.
Salutem dic nomine nostro sodalitati literariae apud vos.
Melchior Macrinus tuus.
Domino Huldricho Zwinglio, viro undecunque doctissimo,
apud Tigurinos euangelistae, amico incomparabili.