242

<< Nr. 241 | Index | Nr. 243 >> 

Absender: Xylotectus, Johannes

Empfänger: Zwingli

Ort: Luzern
Datierung: 16 X 1522

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 597-598

--597--

Domino Huldricho Zuinglio Ioannes Xylotectus S. D.
Accepimus, Myconius et ego, "Sermonem tuum de sancta Maria",
pro quo iterum magnas tibi habeo gratias, non tam pro sermone, quam
pro tuo in me studio meique memoria. De libris meis olim apud te
relictis certior tandem reddi velim, an ne is, quem N. Mantz consuendum
acceperat, nempe Basilius Magnus cum Fulgentio, ligatus
sit, preterea ut duos alios, nempe "Cornucopiae" ac Cyrillum,
eidem consuendos tradas, non habita ratione vel defectus Cyrilli vel
laesionis ultimi quaternionis "Cornucopię". Pro defectu Cyrilli,
nempe quaternione nono, i scilicet minoris alphabeti, papyrum vacuum
pro numero foliorum defectus insuat, ut, si defectum recepero, excisis
foliis suppositiciis vera adglutinem; sin autem defectum nunquam recepero,
utar Cyrillo, quatenus eum habeo, ne propter folia quattuor
vel sex totus inter pulveres situ pereat; datisque libris N. Mantz
calcaria quoque addas, ut citius perficiat. Ceterum ait Myconius
noster te mirari, quidnam in comitiis sacrificorum quorundam apud
Beronam actum sit. Plane nihil eorum, quae suspicabamur; nam
ea gratia ego quoque interfui, ut audirem, quidnam vellet illa magistrorum
nostrorum congregatio. Prima autem sessione cautum est,
ne quis vel suspicetur eos conspirationis causa vel quocunque factionis
nomine, sed solius amicitiae gratia convenisse, sicque preter spem
concilium istud satis laete tranquillum sortitum est finem.

--598--

Vale et de libris, quid agatur, responde.
Bonos viros omnes, qui tecum sunt, ex me salvos dicas. Uxor
quoque te plurima salute impertit.
Ex aedibus nostris Lucernae XVII. Kalendas Novembris
MDXXII.
Credit te uxor gaudia sua gavisurum; iussit enim, ut certiorem
te reddam de tranquillitate sua. Impetus in nos factos iam iterum
vicimus: in aedibus propriis mansit; a quibusdam consanguineis adhortata
est, ne matrimonium neget; a glore audivit sanctius esse, si
matrimonium contraxerimus (incerta est enim de coniugio nostro),
quam prohibito semper uti concubitu. At haec nihil contra impetum
nostratium, nescio an dicam Lucernensium. Quid enim iis cum
Lucerna rei est, qui densissimis tenebris adeo offusi sunt, ut seipsos
videre nequeant? At unus est prestigiator noster, qui solus nobis
imponit; quo superstite nulla spes est resipiscentiae.
Glareanus uxorem duxit. An te vocarit ad nuptias, fac sciam,
anne hac hieme Basileam petiturus sis; haberes enim me comitem.
Iterum vale.
Plus satis te nugis meis obtudi.
An den wolglerten herren meister Uolrich Zwingli zuo Zurich,
sinem lieben herren.