245

<< Nr. 244 | Index | Nr. 246 >> 

Absender: Russinger, Johann Jacob

Empfänger: Zwingli

Ort: Pfävers
Datierung: 28 X 1522

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 604-605

--604--

Iohannes Iacobus, abbt zu Pfavers etc.
Unnser früntlich lieb in rechter bruderlicher trew euch alzitt bevor.
Erwurdiger, hoch= und wolgelerter und ganntz gerechter evangelischer
lerer. Eur lieb ist bericht, was ich nächst kurtz verschiner zytt selbs person=
lich mit euch gerett von wegen eins handels, den wir euch hiemit by disen
unnserm eignen potten zuschicken, denselbigen zuo besehen, in corrigieren,
dozuo und darvon ze thun nach eurem guoten bedunken das, so von Mar=
tin Seger (üns in solichem gemein und gantz heimlich) gemacht, der
anfang ze sin, uff welchs unnser meinung sich grunden wirt, wie ir wol
verstǎn werdent, domit und solichs im [!] heimlicheit getruckt und uffgericht

--605--

möcht werden uff das furderlichst, so es jemer gsin möcht; wöllen euch
der sach annemen und beladenn, ist unnser früntlich pitt, under dem ver=
borgnen tittel des "Stummen" oder under eins anders, wie es guott be=
dunckt guot ze sin, wann es zum theil (bsonder von den predigermunichen)
eben scharff ist; doch unnserm beduncken nach wer unns vermeint under
dem "Stummen". Und wöllen euch nit befremden ab solichem, euch in
unsernn diensten ze üben. Und, sond ir wissenn, beschicht es guoter meinung;
dann wir euch sonder guott vertrawen in rechter lieb und gunst. Unnd so
verr es gerecht wer, unns allein oder dem vogt Martin Seger zuo schicken
durch ein eignen potten. Was costen in der druckery und in allem daroff
gatt, wöllen uns des in geschrift berichten; wend wir redlich usrichten und
bzalen. Und domit es niemant zuokom, dann allein in heimlicheit unns
oder dem vogt Martin. Was euch hierinn mangel wer, mögen ir disem
unnserm potten wol vertrawen; wurt er euch bas berichten. Habend
unns in brüderlicher lieb wol bevolhen, solicher maß wir ǒch gegen euch
sonderlich geneigt sind. Wollen nit ansehen unnser kleinen verstand und
solichs nach eurem wöllen [!] machen; wan wir solichs gantz nicht bericht.
Ettlich artikel werden in einem kleinen zedel begriffen; dieselbigen an ein
sondernn zedel ze machen und ordnenn nach einander, wie sich gepurt.
Datum Pfavers, uff Simonis und Iude anno etc. 15xxijmo.
Die schilt uff das erst platt ze machen; send der dry pünten; soll
der steinbock zuo oberst ob den andren zweyen stǎn.
Dem erwürdigen, hochgelerten herren und evangelischen
doctor meyster Uolrich Zwingly zuo Zürch, unnserem lieben heren. -
Zuo eigner person.