247

<< Nr. 246 | Index | Nr. 248 >> 

Absender: Geroldseck, Theobald von

Empfänger: Zwingli

Ort: Einsiedeln
Datierung: 6 XI 1522

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 609-610

--609--

S. P. D. Min lieber Zwyngly. Es hat mich meyster Iohans
Öchsly, min lütpriester, gar trülich gebetten, sin bruder hansen, zöger
dyß briefs, gegen üch ze fürderen, ob ir im möchtend helfen an ein dienst
by der stat oder underschryber oder derglichen, darmit er nyt verlege;
dan er hat ein guoten anfang ze schryben gelernet ze Wyll by dem stat=

--610--

schryber, und ob es not ist, wurd er lonen von im. Söllich byt han ich
angesechen, und das er min gotzhußman ist, und ander trüw dienst, so
meyster Hans mir erzögt, und byt üch früntlich: lassend üch in bevolhen
sin, als ich üch vertruw. Söllichs ze verdienen mitsampt anderen guot=
theten byn ich gantz wyllig. Darmit sind got bevolhen. Salvos dic nomine
meo salutandos. Item unser sach stat von goß gnaden gär waul [!];
aber wie lang es weret, weyß ich nyt. Item so ir der wyll hand, wete
ich gern, das ir üch besintend, wie ich ein form sölti machen, min pfarr=
priester ze bestetigen uff die pfriend; den ich wyls selber besteten, ursach
ich han sy göttlichs rechts, und dunckt min herren von Swytz auch
byllich, und wend mich darby schirmen. Es gefalt Frantzen und meyster
Hansen nyt wol; darum wend sy mir kein form machen. Ich wyl 's
nyt des minder machen, und sötte das spyl krachen.
Datum ze Einsidlen uff Donstag post sanctorum omnium 15xxij.
Theobaldus von Gerolßeg,
pfleger ietzemal ze Einsidlen.
Item machend die form ze besteten darnach: wölcher die heylsam
trostlich leer Ihesu Chrysti nyt mit trüwen lert, da würt kein besteten
helffen.
Un Uolricum Zwyngly, Zürch, verkünder des worts gots,
minem lieben getrüwen bruoder in Ihesu Chrysto.