251

<< Nr. 250 | Index | Nr. 252 >> 

Absender: Zwick, Johannes

Empfänger: Zwingli

Ort: Riedlingen
Datierung: 27 XI 1522

Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 620-621

--620--

Iohannes Zuic Salutem plurimam.
Accepi ante paucos dies "Apologeticum" ad me ex Constantia
tuo nomine missum, nec solum pro hac, sed et pro incomparabili tua
caeterorumque bonorum virorum mihi apud vos exhibita benevolentia
multas gratias ago. Ego nunc sum apud meos cum magna certe foelicitate,
si modo foelicitas est episcopum habere parum propitium.
Nam cum primum Basilea venissem Constantiam, conabatur pro
sua prudentia mihi persuadere, ne quid novi docerem populum; post
hanc rem etiam egit cum meo parente. Tandem intelligere potui
nonnullos mihi apud illum movere insidias, nec distuli, quin illi scriberem
nonnihil de suis delatoribus et parasitis. Quam grata fuerit
scriptio mea, non scio; at vero nunc sum apud eum atrociter accusatus

--621--

oblato magno cathalogo articulorum. Non tamen adhuc sum
vocatus; sed expecto, quid mecum actura sit sinagoga illa sathanę
[cf. Apoc. 3. 9]. Conabitur fortassis pro merito tractare profugum iureconsultum,
de quo iam spes erat, quod egregiam operam tuendae
tirannidis pręstitisset. Sed Christus me revocavit, ne prophanem
iustitias dei mei, neque illibenter tollerabo [!], quicquid mali hoc nomine
mihi accessurum est, quanquam hoc loco numero sępius oporteat
ingemiscere, mi Zuinglie, quod optimos illos meae aetatis annos in
ediscendis iuridicis studiis tam pessime collocavi. Sed deus bene
vertet omnia. - De te scire velim (si modo audes aliquid confidere
amico), apertum ne sit te cum tuis habere uxores; audivi enim nuper,
quod publicas nuptias celebrasses cum filia prefecti civium. Proinde
certa fama de te est orta, idque auctore quodam sacrificulo, quod
pro contione adserueris uxori pregnanti (si ita adfectet, quemadmodum
sepe solent) non esse a marito negandum adulterium. Quod ipsum
cum certo sciam apud te ne cogitatum quidem, soleo te omnibus
modis excusare, neque vero tam efficaciter hoc possum, quin a multorum
gratia excideris. Et barones quidam, proinde nonnulli viri
nobiles, qui nomini tuo (postquam audissent te in Eremo concionantem)
optime voluerunt, nunc plane de te sentiunt pessime, nec
ullo pacto efficere possum, quin credant huic sacrificulo, quem iurant
falsum esse non posse. Rogo igitur, ad me scribas aliquid in tuam
excusationem, vel unum verbum, quo possim illis in faciem obtrudere
nomen tuum scriptum, ut odiosos apud illos faciam huiusmodi nugatores,
quibus semper solent aurem accomodare, quasi iuratum sit,
quicquid multi autoritate quadam mentiuntur.
Nunc vale et me ama.
Ex Rüdlingen V. Calendas Decembris anno 1522.
Domesticos tuos omnes, Grebelium, Iohannem Hainricum
Göldli et omnes bonos meo nomine salvere iubeas.
Docto et candido theologo Huldericho Zuinglio apud Turregum,
amico suo selectissimo.