274

<< Nr. 273 | Index | Nr. 275 >> 

Absender: Glarean

Empfänger: Zwingli

Ort: Basel
Datierung: 26 I 1523

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 16-17

--16--

Uldrico Zinglio Glareanus S.
Iratam epistolam scribo, non tibi, sed hostibus tuis, nec illis quavis
de causa, sed ob iustam causam. Stetit ad solem Uldricus
sacerdos, bonus vir, ad officinam fabri argentarii; advenit dochtor [!]
Gebuilerus, dochtor Hänsly mitt den lampachten höslijn. Rogavit
aurifer, num universitas quem missura esset Tigurum ad congressum
illum. Homo tum bellus, ut est praeceps et iracundus; es wärind als
buoben, die gen Zürich uff die disputation giengent, dixisse fertur, und
wär der Zwingli ouch ein buob. Sacerdos tum modestiam ex eo postulavit,
sed tantum abfuit, ut compesceretur, ut alia congesserit crimina:
Zwingly wär ein buob und hetty ketzery gepraedigot. At vero tum sacerdos
poscere in testes et aurifabrum et famulum illius, nec multos post
dies tibi haec scripturum sese stipulatus est. Haec ita ad me retulit
sacerdos, nec interim usquam apparuit Gebuilerus ille mihi; atque
id fortassis et commodo meo et illius. Neque enim continerem me,
quin aliquid illi loquerer. Qui, etsi sit homo stultus planeque indoctus,
tamen haec spargit, si non compescat eum quispiam. Si, ut non

--17--

dubito, res tua feliciter cesserit, poteris inire rationem cum senatoribus
tuis, si a senatu unus alterve tecum huc mitterentur, ut iuri
sisteretur. Invisus est senatui; nam priore aestate, cum ab universitate
rector electus esset, senatus eum agnoscere noluit, coactaque est universitas
alium vicerectorem (ita enim appellant) creare. Caetera
de illo caeterisque ganeonibus recitabit Iacobus ille, vir plane modestus
et sane Christianus; neque enim volo nunc te diutius obtundere.
Si adveniet vel Faber vel Gecckius, tracta illos, ut meruerunt;
neuter Germanica lingua promptus est, ut aiunt, qui eos noscunt.
Latine quod sciant, in promptu est. Non dubito te cum modestia
omnia acturum.
Iam vale.
Basileae VII. καlendas Februarias anno Christi M.D.XXIII.
Albertus Burerius mecum fuit; quare non est nunc opus, ut
cum Myconio conferas quicquam, nisi ut me illi plurimum commendes.
Domino Uldricho Zinglio, theologo vere Christiano,
amico nostro summo - Tiguri.