289

<< Nr. 288 | Index | Nr. 290 >> 

Absender: Wattenwyl, Margaretha von

Empfänger: Zwingli

Ort: Königsfelden
Datierung: 14 III 1523

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 49-50

--49--

Gnad und frid in dem heren Ihesu werd üch alzitt mittdeiltt und
geben von gott, dem himelschlichen [!] vatter, amen.
Wolgellertter, wirdiger, besunder lieber her! Min bitt und begeren
ist an ywer erwird, min einfalttig schriben nitt in argem von mir uf=
zuonemen; den mich des zwingtt kristeliche liebe, und in sunders, als ich
vernim, das die euangelisch warheitt und ler fast durch ywer verkündung
des gotzwortz zuonimptt deglich; den ich dem allmechttigen ewigen gott
sag lob und danck, das er uns widerum erlüchtt und gsentt hatt durch sin
geist so fil ttrwier [!] lereren und verkünder sins helgen wortz. Bitt und
beger och von im, das er üch und allen denen, so sin göttlich wortt ver=

--50--

kündend, verlich kraftt und stercke wider all figend der warhett, dardurch
sin göttlich wortt sich mere und czuonem in allen menschen.
Wirdiger, wolgellertter her! Ich schick ywer wird hie ein kleine mei=
nung; bitt üch, dieselben nitt von mir zuo verachtten; den mich sin zwingtt
kristeliche liebe. Bitt üch, ier wellends also dasselb im besten von mir
ufnemen. Ich bitt üch och uf das höchst: ist dise lattwerg für üch, und
ufr ir me begerend, so londs mich wisen; den es mir ein besundre grose
fröid wer, wen ich üch ettwas guotz wist zuo duon - und ich nitt allein,
sunder des erbüttend sich och all euangelisch Kristinen hie in unser ver=
samlung zuo Küngsfelden, welche och ywer wirde yr gebett und gruos
in Christo enbiettend, in des aller sichristen schirm wir ywer erwird
fliscklich befellend.
Dattum uf samstag vor lettare im r̨r̨iij. jar.
Margrett von Wattenwil
zuo Küngsfellden.
Un den wollgellertten wirdigen heren meister Uorich Zwingly,
lüttpriester in dem Grosen münster zuo Zürich, gehörtt diser brief etc.