291

<< Nr. 290 | Index | Nr. 292 >> 

Absender: Russinger, Johann Jacob

Empfänger: Zwingli

Ort: Pfävers
Datierung: 24 III 1523

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 53-54

--53--

Unnser bruderlich lieb in Christo, lieber her unnd bruder! Wir
hannd verstanden eur unmuoß, domit ir beladen send sampt andren euch
geliebten; gott enthalt euch alzytt mit sinen göttlichen gnaden etc.
Die buechlin, unns zuogeschickt, hand wir mit sondren freuden emp=
fangen; uff solichs den keslertag usgeruefft; hatt nit jederman wol ge=
fallen. Ligt nit an; send nit guott christen. Doch wend wir euch nit
verhalten: wir haben nit ein gnädigen heren an dem bischoff, hierum
wir uonnser trost uff euch gesetzt; werdent unns villicht bystand thuon
muessen, wann wir euch werden berueffen. Von wegen meister Erharts
eurem verschriben hettind wir willen ghöpt, im ein welschen trunck ze
schicken; hatt unns nit wöllen geschickt beduncken: ursach, ir send bericht,

--54--

wie man mit win uff dem land handlett. Schicken im hiemit in disem
brieff dry guldin an gold; wollend im die überanttwurten, nit von
wegen muet noch gaben, besonder zuo anzögen früntlicher lieb und mei=
nung, von unnsertwegen ein schlafftrunck domit ze thuon etc. Das ge=
dicht haben wir durch unnseren eignen potten gen Augspurg geschickt
zuo guoten gesellen, mag aber nit vertig werden von [!] Churer kilwy;
alsdann so wirt es uonns gevertiget. Wir send in hoffnung, ir kemend
ǒch gen Nevels in osterfirtagen; send wir willens, unns dohin ze
fugen; werdent euch wyter berichten. Wöllen unns allzytt mit bruder=
licher lieb (als wir euch wol vertrawen) bedenken unnd unns ettwas
news zuoschicken und schriben by disem potten - thuond ir unns ein wol=
gefallen -, ouch meister Erharten vast ze dancken, wir ir wol kunden.
Unnserem herrn und mitbruder meister Lew unnser lieb und gunst, och
andren euch geliebten ze sagen, ist unnser früntlich pitt. So wir schriben
euch "unnser lieb", beschicht nit allein von unnsertwegen, besonder ouch
deren, die mit unns allen in christlicher lieb verwant send und der
euangelischen ler mit unns anhangen, dero wir ein guott theyl haben.
Hiemit wöllendt wir unns unnserem einigen herren und meyster Christo
bevolhen haben.
Datum Pfavers 24 Marcy anno etc. M.D. xxiij.
Johannes Jacobb, abbt zuo Pfavers.
Euangelico doctori magistro Hulderico Zwinglio,
predicatori Thuricensi ad manus. Cito cito. - Zürch,
herrn meyster Uolrich Zwingli.