297

<< Nr. 296 | Index | Nr. 298 >> 

Absender: Weiss, Adam

Empfänger: Zwingli

Ort: Crailsheim
Datierung: 14 IV 1523

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 65-66

--65--

Gratia tibi et pax a domino Iesu.
Vir eruditissime. Veniam deprecarer in primis, quod tale tuum
pectus nil nobis preter Christum spirans meis nugis vel tantillum a
sua sacra meditatione remoror, nisi iam perspectissimus mihi esset
morum tuorum candor vere Christianus, ac, que omnia fert [1. Cor.
13. 7], charitas meas ineptias excusaret. Vidimus iam pridem piissimas
lucubratiunculas tuas aliquot, inter quas mire placuit acris ac
vere erudita tua cum vicario Constantiensi disceptatio. Ut iacent,
ut frigent omnia istorum nugamenta! E diverso: ut tua ardent, urgent
omnia! Non alia comodiori via traduci posset impia ac insignis papistarum
temeritas, quam cum tecum tuique similibus committuntur homines
deplorandi verius quam miserandi. Fusiorem positionum tuarum
explanationem, si aedita est, pręcor, optime vir, ad me transmittas,
aut si quid aliud interim peperisti; simulque indica, quo animo feras
collegii tui ritus, ceremonias aliaque id genus. Apud nos plus satis
adhuc lacte vescuntur [1. Cor. 3. 2]; tarde nimis grandescunt in Christo,
Horrendum missarum abusum ac nundinas, scribi non potest, quam
indigne feram. Quid faciam? Si ita dissimulare pergimus, alitur impia
illa populi stultitia, et vix sine tumultu hec subito inverti possunt.
Rursus nescio, an tanta sit ratio habenda vel scandali vel tumultus,

--66--

ut ob id tantas abhominationes semper feramus. Doleo - et quid
aliud possum? - nos nondum legittimam habere ecclesiam, messem
adhuc in semine esse. Te vero foelicem, cui talis patria, talis populus
obtigit! Insaniunt apud nos tum profani tum ecclesiastici principes.
Et si nil palam audeant, clam tamen non desinunt verbi ministros
miris modis divexare. At ita est verbi conditio. Boni consule
hec effusa verius quam scripta, sic urgente nuntio, et me tuis litteris
non dedignare. Oremus Christum, ut cum plenitudine benedictionis
euangelii obruat omnes nos.
Bene vale in gloriam Iesu et perge, ut facis; in apertione oris
tui cum libertate notum fac mysterium euangelii Christi, qua legatione
fungeris [Eph. 6. 19]. Dominus adsit spiritui tuo [2. Tim. 4. 22].
Raptissime. XIIII Aprilis 1523.
Adam Vueiss, inutilis verbi minister in Creilsheim.
Eximio viro domino Ulricho Zuuinglio,
Thuricensis ecclesiae contionatori euangelicissimo,
suo in Christo maiori.