308

<< Nr. 307 | Index | Nr. 309 >> 

Absender: Hutten, Ulrich von

Empfänger: Zwingli

Ort: s. l.
Datierung: (Nach Mitte VII 1523)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 93-94

--93--

S. In thermis parum commode cessit, quod non satis calent.
Videtur penitus nihil contulisse ad recuperandam valetudinem hoc
laboris et periculi, quod impendi. Verum abbas dici non potest,
qua me humanitate et quam liberaliter tractaverit. Hoc nomine ages
illi gratias, cum scribes aliquando; nam tibi et commendatori gratificatus
in me est. Abeuntem obnixissime oravit, ut totas aliquot ebdomadas
secum perquiescerem. Etiam equos et reliqua ad viam large.
Consuluit, aliquando repeterem thermas; nunc, quo minus profuerint,
in caussa fuisse pluviam, quę per omnes hosce dies miscuit se balneo.
Neque unquam defuerunt frigidae aquae aut caelo iam cadentes aut
nuper demissae a rupibus profluentes, quarum aliquando violenti torrentes
ruinam quoque domunculis minati sunt. Et haec de thermis,

--94--

ubi nunciatum mihi est venisse istuc Nicolaum Prugnerum a Mulhusen,
praeterea literas ad me. Quae omnia ut habeant, statim
significa et, siquidem literae sunt, hisce perferendas trade. Item,
quod hospitium mihi paraveritis, fac sciam; nam hodie istuc promovissem,
nisi dubitassem, quo divertendum esset. Non dubito, quin
haud defueritis mihi hac in re.
Quicquid est, certiorem me fac et vale.
Vlrichus ab Hutten eques.
Vlricho Zuinglio, Tigurino presbytero, euangelistae Christianissimo.