347

<< Nr. 346 | Index | Nr. 348 >> 

Absender: Zwingli

Empfänger: Oecolampad, Johannes

Ort: Zürich
Datierung: 9 X 1524

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 226-227

--226--

Gratia et pax a domino. Rumor est principem Wurtembergensem
te sibi in usum euangelii iunxisse. Ego ab eo homine
aliquando vehementer abhorrui; verum si ex Saulo Paulus factus
est, non aliter amplecti possem hominem quam fratres Paulum, quum
resipuisset. Quidquid in hac re senseris, indica! nam nos, si fides
adsit, cum illo, quae maximo sint emolumento rei Christianae futura,
tractare poterimus. Cupio autem in summa scire, posteaquam de fide
docuisti, ubi nunc sit, et qua ratione tuto queam ad illum literas dare,
puta si sit in Monte Peligardi; nam si in arce Twiel est, meopte
Marte, si voles, ad illum mittam literas citra tuam operam. Provocationem
Balthasaris nuper missam aut excusam ostende aut

--227--

exemplar remitte, utrumque hoc nostro bibliopola tabellione. Plura
non permittunt occupationes. Reliqua omnia memorabit bibliopola.
Saluta Annemundum, Farellum, Bonifacium, cum datur.
Vale, ex Tiguro 9. Octobris M.D.XXIIII.
Huldrichus Zuinglius tuus.
Iohanni Oecolampadio, fratri nostro in domino carissimo.