36
Absender: Nesen, Wilhelm
Empfänger: Zwingli
Ort: Paris
Datierung: 5 V (1518)
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 82-83
--82--
Eruditissimo domino Vdalrico Zinlio Nesenus S. D.
Scripsi tibi non admodum pridem literas latiores verius quam
doctas, sed vereor, ut ex fide tibi sint redditę: videbatur enim tabellio,
cui id dabam negotii, temulentior. Sed ut ut sit, non vacat
in presentiarum eandem rursus agere tragediam. Illud unum ex te
peto, nec tamen pro meo veluti iure accipias velim, ut, quoties ad nos
commode tibi fuerit oblata scribendi occasio, ne illam preterlabi patiaris.
Hoc namque fiet, ut Udalrici mei refrices mihi sepius memoriam,
tametsi nunquam non oculis obversetur. Hic, qui ad te has
meas denuo perferet nugas, magister est academię Parrhisiensis,
vir, quantum cernere datur, non usquequaque indoctus, nec (ut est in
usu quibusdam huiusce generis hominibus) moribus illaudatis, petiitque
ex me, simulatque inaudiverat, inter nos esse mutuę amicitię commercium,
ut non committerem, quin te literis salutarem ac hiis ipsis insererem,
si quid esset apud vos religionis commendatione preclarum,
ut illius sibi per te fieret inspiciundi copia - hac siquidem potissimum
gratia vos istic adiit - quod te, qua es humanitate, haud gravatim
confido facturum. Et ipse invicem referet tibi bellum hisce
diebus proximis in Hollandia confectum, in quo reliquię lanciariorum,
--83--
qui, ut auguror, in hoc ab Helvetiis servati sunt, quo turpius
perirent, ad unum universę deletę sunt.
Vale, doctissime Udalrice, et si quando Beato Rhenano Germanię
nostrę decori unico scripseris, fac ut me illi quam diligentissime
commendes.
Parrhisiis tertio nonas Maias.
Doctissimo domino Udalrico Zinlio, in Eremo divę
Virginis apud Helvetios parocho, suo amico eximio. -
Meyster Ulrich Zwinglyn, kilgherr zu Eynsidelen.