384

<< Nr. 383 | Index | Nr. 385 >> 

Absender: Oecolampad, Johannes

Empfänger: Zwingli

Ort: Basel
Datierung: 16 IX (1525)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 365-366

--365--

S. in domino, frater dilecte.
Neque nobis adhuc facta est copia libelli nostri de eucharistia;
at quam primum allatus fuerit, proximo nuncio exemplaria quędam vobis
afferri curabo. Tuus liber mihi plurimum placet. Adversarii nostri,
quod nequeunt scripturis ac rationibus improbare, subsannando reiicient
tam stulti, ut omnes stultos credant et non agnoscentes suam stulticiam.
Ille noster dubię fidei frater, cui legendum transmiseram, respondit:
parum theologię, multum philosophię inesse nostris libris. Expectat
nimirum, quid Saxonicum idolum sit responsurum. Verum interea
magna pars infirmorum inveterato laborat morbo. Erasmus duos
libros edidit, unum adversus Sutorem quendam Carthusianum,
qui ęgre fert editiones novi testamenti alias post Hieronymum,
alterum, cui titulus "Lingua", mea sententia librum dignum lectione;
in neutro nobis adversatur. - Impressit Frobenius et grammaticam
Elię Levitę, Hebręi, non contemnendę eruditionis librum. Miseram

--366--

Latomi "Elleboron" per Christophorum, sed intelligo nondum
perlatum. Ut primum venerit eucharistię libellus, nisi nuncii desunt,
participes vos eius faciam. Sacrifici et consortes illorum facile condonarent,
quicquid hactenus a nobis doctum; unum hoc dogma de
eucharistia, quod vel papa vel Lutherus tradidit, convelli nolunt; est
enim arx et pręsidium impietatis eorum, per quam recuperare sperant
successu temporum, quod nuper amiserunt.
Salvo hoc idolo nemo eos recte impios condemnarit. Narravit
mihi Christophorus, quid filii Belial [5. Mos. 13. 13] adversus te
moliti, et gaudeo te ereptum e manibus insidiantium [Ps. 71. 4].
Hisce tyrociniis erudit dominus, ut in maioribus certaminibus de ęterna
vita nobis promissa nihil dubitemus.
Vale.
Basileę 15. Septembris.
En ipsa hora, qua occlusurus eram literas, attulit quidem literas
cum uno et altero libello, quos mitto. Sed nulli sunt, si cum tuis
conferantur. Mitto autem et apologiam Lutheri nostro Gulielmo.
Iterum vale.
Ioannes Oecolampadius.
Charissimo fratri suo Huldrico Zwinglio, Tigurinorum episcopo.