404

<< Nr. 403 | Index | Nr. 405 >> 

Absender: Oecolampad, Johannes

Empfänger: Zwingli

Ort: Basel
Datierung: 4 XI (1525)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 417

--417--

Gratia a Christo, mi frater.
Post ablatos a bibliopolis per senatum libellos meos nihil novi
auditum. Mussatur, et secreti quippiam alitur. Rumorculus est me
eiiciendum. At ille perpetuus. Gregem tenet trepidacio. Ego, spem
in dominum habens, indignum arbitror a stiva respicere [Luc. 9. 62];
unde et in die omnium sanctorum, ut diem festum agerem cum sanctis
viventibus, cenam dominicam aliquanto simplicius celebrare cepi. Fieri
potest adversarios iterum exulceratos. Unde autem non exasperantur,
nisi forte infortuniis nostris? Fama est occasionem τῇ Βουλῖ [!] ab
Erasmi literis et Carlstadii levicula revocatione prębitam; nimirum
vel inspecta fistula saltabunt fauni. Placuit ultramodum, quod
responsum Erasmo; remitto αὐτόγραφον. Sic oportet spiritus illos
mendaces diiudicare. Hezerum tibi commendo, ab Augustanis
amicis non parum ob fidem dilectum, tametsi inde cedere coactum
potentia et authoritate impanatum quam crucifixum Christum diligentius

--418--

prędicantium spirituique eius resistere non valentium; et iidem
nunc scribunt ideo proscriptum, quod tibi ac Leoni fecerit negocium
et ex catabaptistarum numero sit, quum plane cognoscam illum pridem
resipuisse vobisque addictissimum. Fortassis, ubi coram vobis se
purgarit, licebit ei et Augustam facilius reverti. Nihil adhuc ex
consuetudine eius displicuit. Librum "De eucharistia" versum secum
afferet. Tuo consilio in ea re utetur, num edendus vel supprimendus
sit.
Sebastianus Maier hodie sistitur senatui, ignoraturque causa.
Pręsagit animus meus nescio quid sinistri. Omnem enim lapidem
movent ἐχθροὶ et, quacunque possunt, nocent.
Tu hilari animo vive ac triumpha de baptistis novis.
Vale.
Quarto Novembris. Basileę.
Tuus Oecolampadius.
Huldrico Zwinglio, pientissimo in verbo et opere ministro Christo,
Tigurinorum antistiti, fratri suo.