41
Absender: Pucci, Antonio
Empfänger: Zwingli
Ort: Zürich
Datierung: 1 IX 1518
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 95-96
--95--
Anthonius Puccius, subdecanus ecclesie Florentine,
camere apostolice clericus, ad Elvetios magne lige veteris superioris
Alamanie cum potestate legati de latere nuncius, dilecto nobis in
XPo Vdalrico Zinglio, rectori parochialis ecclesie ville Claronensis
Constanciensis diocesis, sanctissimi domini nostri pape et apostolice
sedis accolito capellano, salutem in domino sempiternam. Virtutibus
clarens et meritis sicut experiencia et fame laudabilis testimonio
commendaris, illam in domini nostri pape et apostolice sedis conspectu
gratiam meruisti, ut personam tuam literarum sciencia preditam paterna
benevolencia prosequentes illam iuxta facultates nobis a prefato
domino nostro papa concessas specialis honoris titulo favorabiliter
attolamus [!]. Ut igitur in effectu percipias, quid suggerit nostre
--96--
mentis affectus, te, qui in artibus magister existis, premissorum meritorum
tuorum intuitu extollere ac specialis honoris titulo ac prerogativa
decorare volentes teque a quibusvis excommunicacionis, suspensionis
et interdicti aliisque ecclesiasticis sentenciis, censuris et penis
a iure vel ab homine quavis occasione vel causa latis, si quibus
quomodolibet innodatus existis, ad effectum presentium dumtaxat consequendum
harum serie absolventes et absolutum fore censentes, tuis
in hac parte supplicationibus inclinate te in domini nostri pape et
apostolice sedis accolitum capellanum auctoritate apostolica, nobis
per sanctissimum in XPo patrem et dominum nostrum dominum
Leonem, divina providencia papam decimum, concessa, et qua fungimur
tenore presentium, recipimus et aliorum domini nostri pape et
sedis huiusmodi accolitorum capellanorum numero et consorcio favorabiliter
aggregamus, tibi nichilominus concedentes, ut omnibus et singulis
privilegiis, prerogativis, honoribus, exemptionibus, graciis, libertatibus,
immunitatibus et indultis, quibus alii domini nostri pape et sedis
huiusmodi accoliti capellani utuntur, pociuntur et gaudent ac uti,
potiri et gaudere poterunt, quomodolibet in futurum uti, potiri et
gaudere libere et licite valeas - non obstantibus constitucionibus et
ordinationibus apostolicis ceterisque contrariis quibuscumque. Sic
igitur de bono in melius studiis virtutum intendas, ut in prefati
domini nostri pape et nostro conspectu ad maiora te semper constituas
meritorum studiis digniorem ipseque dominus noster papa et nos
ad faciendum tibi uberiorem gratiam et honorem merito arctius invitetur [!].
In quorum fidem has presentes fieri nostrique sigilli iussimus
et fecimus appensione communiri.
Datum Thuregi Constanciensis diocesis anno incarnationis
dominice millesimo quingentesimo decimooctavo Kl. Septembris, pontificatus
prefati domini nostri pape anno sexto.
Gratis de mandato reverendi domini nuncii.
G. de Falconibus. M. Bretinj. M. Bretini pro secretario.
Io. Nuchelen.
A tergo, von alter Hand Accolitatus pro domino Vdalric o Zwingli.