419

<< Nr. 418 | Index | Nr. 419a >> 

Absender: Oecolampad, Johannes

Empfänger: Zwingli

Ort: Basel
Datierung: 7 XII (1525)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 453-454

--453--

Gratia et pax a Christo, charissime frater.
Accipe et alterum fasciculum, magis forte desideratum quam
iucundum, certe non contemnendum, ne scilicet ignoremus, quid et
quantum valeant adversarii, egregii illi spirituum pensiculatores.
Bugenhagius in me scribit, redarguturus conscientiam meam, quod
perperam veterum protulerim sententias. Strennue agunt et, ut leges,
non permittunt extorqueri non esse articulum necessarium. De originali
peccato non faciunt tecum, et hinc potissimum te aggredi molientur.
Negocium, vereor, magis inde suborietur; proinde amice pro
mea simplicitate monuerim, ne quid temere vel subito. Neque ego
satis intelligo, quid natalicii peccati nomine non admittas: num omnes
pueros ita puros velis, ut etiam regni introitu per gratiam Christi
sint idonei, an puros quosdam asseras per subsequuturum dei donum.
Proclivitatem sane peccandi, opinor, fateberis in omnibus propensiorem,
quam antequam prior Adam peccarat. A Pelagianorum sententia
libens, quantum per scripturam possum, recedo. Doleo, quod super
eo argumento non uberius superiore anno coram tecum egerim. Nam

--454--

in itinere quędam in mentem venerant; at nihil ambigo, quin ubique
per Christum dexterrimum sis acturus militem, ubiubi te organo
usurus est. Sacerdotes Argentinenses in Capitonem et civitatem
Argentinensem valvis templorum quędam inscripserunt, ut involvant
bello. Sed quę sint, ignoro. Quid non facit insaniens Satan?
Vale.
Septimo Decembris. Basileę.
Ioanne Oecolampadius.
Huldrico Zwinglio, Tigurinae ecclesię episcopo vigilantissimo,
suo fratri.