437

<< Nr. 436 | Index | Nr. 438 >> 

Absender: Pellikan, Konrad

Empfänger: Zwingli

Ort: (Basel)
Datierung: (anfangs 1526)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 494-495

--494--

Gratiam ac fortitudinem in Christo ad preliandum bella domini
[1. Sam. 18. 17], quibus te dominus ducem constituit non ignobilem,
charissime mi frater in Christo.
Subito mihi innotuit ad te nuncius reversurus ac fidelis, per quem
renunciare potes, quę credis placere domino. Cuius ego vocationem
magnanimiter expecto, certus me non relinquendum a sua gratia, quam
a puero semper sensi, si non vobiscum, ubi magna copia est doctorum
virorum, ut mea opera non indigeatis, saltim alibi. Non dubito esse,
qui ambiant munus huiusmodi. Ego non ambio, certus mihi non nulla
deesse, ut satisfacere mihi de omnibus nequeam, quę Hebreus sermo
difficilia continet, eo tamen fortassis doctior aliis, quod de me non
tantum praesumo, quantum alii, licet arbitrer ex Germanis non superesse,
qui studiosior fuerit harum rerum, qui tamen usque hodie preceptorem
in multis desiderare cogar, quem non sim facile inventurus.

--495--

Utcunque sit, tu, oro, prudenter agas et cogita, quid agendum. Nihil
est, quod non Christi domini causa subiturus sim, eo adiutore. Hactenus
eciam soli mihi profeci, nunquam putans me publice pręlecturum;
nunc autem domini voluntatem cernens, necesse est me novis studiis
navare operam, id quod et temporis lapsu et diligencia suppeditabitur.
In utramvis sortem operior, quid iubeat dominus, et te, eius servum,
sustinebo, donec bonum, quod videbis, significabis. Terret me iudicium
dei super dominum Baltasarum, quem Satanam euangelio factum
indoleo. Suffecissent ex papistis mille alii.
Gratiam tibi conferat Christus, ut cum illo lucreris multos
[1. Cor. 9. 19ff.], et prevaleat in te Christus, in gloriam suam . . .
Fidelissimo Christi servo et episcopo Tygurino
Huldricho Zuuinglio, charissimo fratri.