453

<< Nr. 452 | Index | Nr. 454 >> 

Absender: Lüthart, Johannes

Empfänger: Zwingli

Ort: (Basel)
Datierung: (zirka 22 II 1526)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 528-529

--528--

Gratia Christi tecum.
Si michi in hominem aliquem eciam furibundo animo grassari
liceret, liceret maxime in te vel unicum. Dampnum enim gravius
nemo mortalium hactenus michi intulit, quam tu unicus Zwinglius.
Quale, inquis? Omnium denique adversitatum, periculorum et laborum
usquam perpessorum unum habui compugnantem, commilitonem et
collaborantem Pellicanum, illum videlicet, quem tu modo michi
auffers et cuius copia me privas, et ita privas, ut me solum in medio
nedum luporum [Matth. 10. 16], imo leonum, relinquas. Ve michi soli,
cum in aliquam cecidero adversitatem! quem enim habebo me fulcientem?
Veritatem dico in Christo, et non mencior [Röm. 9. 1]: gravius
damnum inferre non potuisses, et mors ipsa levius esset, quam me

--529--

solum inter tot aspides et basiliscos relinqui. Nec aliquid superesse
video michi nisi mortem ipsam. Non tibi invideo, quod tuum tuorumque
negocia promoves; id autem me male habet, quod cum tanto meo
et aliorum malo atque dispendio tua promoves. Uti licet privilegio,
sed sine alterius preiudicio. Tu igitur, si hominem tantopere a te
lesum reconciliare vis, quemadmodum et obligaris, eo pacto continget,
ut aut Pellicanum restituas, aut alium huic similem surroges, aut me
pauperculum una post Pellicanum ad te revoces. Manere amplius
nec possum nec volo; vagari autem per mundum in verbi praeiudicium
perhorresco. Interim tamen nec vos Tigurinos gravare opto. Hoc
unum peto per Christum Iesum et eius fidem obque hanc, quam
intulisti lesionem: fac, ut saltem in aliquo, eciam minutissimo, pago
locus mihi pateat a dominis tuis. Spero te non frustra laboraturum.
Ceterum meam necessitatem meumque animum in te et alios fratres
viva vox Pellicani lacius referet. Tu me interim eo pacto recommendatum
habeas, quo animus meus tibi iunctus est, et vale.
Ceteris fratribus animi mei promptitudinem annuncia cum salute.
Frater Iohannes Lüithartt, tuus confrater in Christo.
Christianissimo atque doctissimo Huldrico Zwinglio,
ecclesie Tigurine praefecto in verbo, amico et fratri in Christo.