454

<< Nr. 453 | Index | Nr. 455 >> 

Absender: Oecolampad, Johannes

Empfänger: Zwingli

Ort: Basel
Datierung: 25 (?) II (1526)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 530-531

--530--

Pax et gratia a Christo.
Venit tandem, mi Zwingli, optatus et toties evocatus Pellicanus,
quem non est opus, ut commendem viris tanta humanitate et
pietate pręditis, maxime quum ille innocentia et virtutibus apud vos
facile alios commendare valeat. Fieri potest, ut primis mensibus adhuc
oleat monasticen, sed statim accommodabit se moribus vestris.
Argentinensium res bene habent, tantum Capito minus valido
corpore est. Bucerus respondebit publice Brentio; nam Brentii
quędam epistola impressa est, quam ille Bucero scripsit in re eucharistię;
at Buceri responsionem non adiunxerunt ii, qui ediderunt.
Vide simplicitatem Suevorum! Lutherus quoque Rutlingenses a
favore nostro dehortatus est epistola, quam nondum vidi, polliceturque
adversus nos ingentia. Verum quid contra veritatem pręvalebit
caro [2. Cor. 13. 8]? Billicanus nuper ad me literas satis prolixas
dedit et videtur nonnihil accedere ad sententiam nostram. Mavult

--531--

tamen allegoriam admittere quam partium metaphoram, et dicit, portionem
bonam epistolam ab Urbano suppressam. Iterum videmus, quo
candore gerantur res ab adversariis; et quum ipsi tales sint, reiicere
tamen in nos conantur dolos! De te queruntur epistolam ad Ruttlingenses
editam, quam tamen non miseris suo domino.
In nostris "Apologeticis" scis tibi omne ius; agitur enim communis
causa. Non possum et hoc non significare plerosque male interpretari,
quod non consentias in disputationem hic habendam, neque
Tygurum egredi velis. Verum hi, qui ita loquuntur, nec tui nec mei
rationem habent. Mihi nondum persuasum est usquam instituendam
disputationem, sed nihil aliud agi, quam laqueos poni. Nam si veritatis
amantes forent viri illi, quanto compendio ad illam pervenire
possent! Orabimus dominum Ihesum, ut et nobis spiritum consilii
subministret, ne quid vel agamus vel omittamus, quod ad sui nominis
gloriam spectet. Brevis enim est hęc vita et anhelandum est ad ea,
quę speramus, et speranda aliis prędicamus.
Vale, letus et fortis in domino.
Basileę anno 1525, die mensis Februarii[!].
Ioannes Oecolampadius.
. . . issimo Huldrico Zwinglio, ministro Christi,
charissimo suo fratri.