463

<< Nr. 462 | Index | Nr. 464 >> 

Absender: Salzmann (Salandronius), Jakob

Empfänger: Zwingli

Ort: Chur
Datierung: zirka 1 IV 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 552-554

--552--

Gratia et pax domini Iesu Christi tecum.
Veniet ad te, doctissime mi Huldriche, Ioannes Blasii, episcopus
in Melans, qui post Comandrum vita, moribus et doctrina
herbascenti Christo apud Rhetos fons irriguus fuit et oves suas
Christo ita lucrifecit, ut abrogata missa et idolis sepositis nunc
ceperint Christiane magis vivere, quam vel cives nostri vel alii, apud
quos euangelium predicatur. Ille pius frater, iuxta literas novas
Ligae in pastorem electus, deiecit e nido impium istum [!] et crassum

--553--

papae pecus licentiatum Bartholomäum Castelmur, qui diu magna
prius invidia mota apud primores et impios, tandem occasione arrepta
ex instructione Cacabi in comitiis eum proxime habitis acerrime et
ut hereticum et illi similimum [!] in Flaesch accusavit et detulit.
Tandem vicit impietas, ut posthabitis precibus, iure, literis Ligae, et
quod ipse Rhetus natus, iussus sit pius frater missare aut cedere beneficio
et proscriptus a terra et regione trium Ligarum abesse, dictis ad
hoc feriis pascatos. Eorum igitur tyrannidi obtemperatus [!] et ne quid
sevius tentaretur in suos subditos, ad te ut Rhetiae nostre patronum
et benignissimum fratrem divertit, expectaturus futura comitia, sperans
mitiora fore. Interim refocilla tuis consolationibus et tuis consiliis
adiuva fratrem nobis omnibus et charum et utilem. In hoc enim
scripsi, ne tu putares, id namque timuit, falsum (ut multi nunc occurrunt
et nobis imponunt) et ipsum esse erronem. Si quid igitur huic
feceris, facies, ut nobis charissimo et gratissimo fratri. In Engadina
simili furore proscriptus est Philippus Galitius, et Leonem alium

--554--

ea temeritate aggressi perficere non potuerunt, prohibiti pluralitate
amicorum et suarum ovium in Lowin, ubi recens est electus in
pastorem. Proximus est Comander noster, si quid minis impiorum
credendum. Cacabus mira et magno estu coquit. Det deus, ut ipse
tandem exedere cogatur, homo indies magis impius. Operam mutuo
collocant ipse et Ludovicus Tschudius, Ströly et Victor.
Quare, observandissime mi frater, quibus potes, non desistas succurrere
vel consulere nobis. Dominus Iesus Christus det, ut diu nobis incolumis
vivas et eius manu sustenteris. Tschudius certo apud suos
proximum ex Berna rediens sparsit futuram esse disputationem in
Baden, quo tu sis venturus. Fac, si verum est, sciamus. Commenda
me Leoni, Sebastiano et Ioanni Iacobo. Catabaptistae iterum
apud nos nidum parant, semel professi, non ex deo fuisse suum negocium;
nunc relapsi, a vestris tam miraculose e turri liberatis confortati,
contumatiores quam unquam prius. Hoc heri expertus non
ab infimo illorum. Deus omnia in suam gloriam vertat.
Curie in feriis pascalibus, anno 1526.
Iacobus Salandronius tuus.
Minem lieben heren und bruoder, mayster Uolrichen Zwingly.