469

<< Nr. 468 | Index | Nr. 470 >> 

Absender: Capito, Wolfgang

Empfänger: Zwingli

Ort: Strassburg
Datierung: 16 IV 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 565-566

--565--

Gratia Christi tecum.
Scribis, ut admoneamus, quę in tuis lucubrationibus novissimis
mutata vellemus. Id libere pręstabimus. Muta nobis hortatoribus
animum mutandi; nam argumentis densis ac perspicuis causam agis
absque convitio. Esto talis in posterum! Violenti illi scripturarum
tyranni si adoriantur te convitiis, suo certe impetu frangentur. Certe
meliora nescio quo pacto expectarem in tam difficili et odioso argumento.
Iterum monemus, tonitrua et saxa rotantibus adversariis tu
lene istud fundere ne cesses. Magnam enim argumenti vim in causa
fidei pacata mens prę se fert, qua scripturarum firmamenta roborentur.
Nos lucem, quia vero nitimur, amamus, illi tenebras, quia autoritate
personata valent, offundunt sedulo. Det dominus, ut ubique gloriam
dei quęramus. Victoria tecum stat, mi Zuingli, quia stas a puritate
Christianismi, nisi verbum suum a mundo dominus adimere velit.
Grata sunt, quę nuncias de Bernensibus. Speramus et reliquos
accessuros. Senatus noster his diebus cum sacerdotibus perfugis
clementissime tentavit rem compositam, sed omnino frustra. Causa

--566--

pietatis concordiam diremit, cum illi nihil concordię admittere, quod
pietatem resiperet, dignarentur. Ardua minantur, sed vana prorsus.
Stultuli enim literis aulicis fulti tantopere ferociunt. Brevi ambient
conditiones modo reiectas. Comes de Hanow cives nostros arte
turbat. Velitationes gliscunt publici belli. Hodie apud senatum de
reliquis missis antiquandis (quinque enim quotidie peraguntur) agemus,
eoque paucioribus scribo. Bucerus et reliqui fratres te salutant, cumprimis
Farellus et Gerardus Rufus, quem nos Tolninum nominamus;
latere enim voluit. Heidelbergę et passim emergunt, qui in
eucharistia carnem quęrere omittunt. Suevos cum suo "Syngrammate"
die fierzehen Nothelfer appellant, contumeliae causa, vel
potius ludibrii; nam a nostris abest animus ad iniuriam. Mattheus
Zellius nobiscum facit, sed magna tandem difficultate eo perductus
est. Sunt, qui coram nobis subscribunt et absentibus amicis aliud
affirmant. Cuiusmodi fucos contemnimus, nisi quatenus eis ad commodum
ecclesię abuti possimus.
Vale.
Argentorati 16. Aprilis anno 1526.
Pellicanum, Myconium, Leonem Iudam, et reliquos fratres
plurima salutate impertior.
Capito tuus.
Huldericho Zvinglio suo. - Zurch.