487

<< Nr. 486 | Index | Nr. 488 >> 

Absender: Salzmann (Salandronius), Jakob

Empfänger: Zwingli

Ort: (Chur)
Datierung: 22 V 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 606-609

--606--

Min früntlicher und lieber brueder Uoli.
Grad zuo diser stund bin ich ainer sach innen worden, die ich main
lieb sin dir zuo wissen. Als faber im lettsten buechlin von dir verantwurt
tröwt, uff ainen ze bringen, jung und och glert in spraachen etc., ist ain
jüngling von Emps bürtig im Schwäbälbad; hatt ainen brueder, ist ietz
camerer im capitel an unser siten s' Rhins, in Roschacher capitel, meister
Wilhelm, pfarher zuo Montigäl oder Oberriet, ain fyend der warhait
und wirt dess füchslins, von Appenzell vertriben. Hatt inn, disen sin

--607--

brueder Jacob, zu Lips und Wirtenberg [!] verlegt in studio, tdreffen=
lich vermässen, wolgschwätzt, verachtlich, liederlich, ruemsär, scortator et
potator und ain groser fyend und schmächaer der Schwitzeren, als von
im sagend die, so by im zuo Wirtenberg sind gsin, und ich noch bas
erfaren wil. Diser Jacob ist kumen, ietz in der vasten vergangen ain
jar gsin, von sinem brueder getrungen, das er sich liese wichen. Und in
examine kam er so zuo grosen eren mitt sim gschwätz; wann er dorfft
tdrucken herus Lutherum schelten und Philippum, sin preceptorem
Philippum [!], och kuschgen, von denen er um sines liederlichen wäsen
und verhowen muls halb villicht nit als hoch harfürgezogen ward und
ghalten, als er sich sälbs hielt. Also ungefar was apt von Luci och

--608--

in examine. Er gab sich inn zuo ainem schuolmaister anzenemen und mit
der zit ain procurator consistorij uss im ze machen. Das nam Iacob
an, fieng an grece und hebraice läsen; stond im warlich nitt als übel
an, als wir uns daruff verstuendend. Doch ward er glich mued. Ich und
Comander hörtend inn nitt. Ich kant inn Protheum und nugigerulum.
Er ist ain schwatzman, und wie er was, als hielt er sich, vita et doctrina
impijssime, das im der apt selbst zuoletst urlob gab, bis erst kurtz=
lich hatt er die lectur zuo Tübingen überkummen und ist mit ainer langen
epistel geraitzt und erbetten worden per Christum et nomen eius, das er
gon Baden kumme, helfen eer inlegen wider die kätzer etc.. Dise epistel
ist dem apt Sant Luci geschickt und gläsen worden von Ioanne
Brüstly, der es mir gsagt hat uff ietz, und wirt er dess aptz schuol=
meister, als ich main, und so wil er luogen, ob im das und anders ab=
zeschriben wärd. Er sagt mir och, wie faber den apt tdräffenlich ge=
römpt hab und gesterckt, das er amiger [!] so dapffer widerstand thuege
der nüwen kätzery. Ich wil fast huslich sin, ob ich etwas erschnappte.
Ich schick dir hie ain brieffly; hatt diser Iacob Ionas, ainest min
schuoler hie z' Chur, mir zuogeschriben, vergangne vasten ain jar, uss
siner herbärg, da er vernam, wie ich nitt me schuolmaister was der stifft.
Als mich duecht, ist er kum über die rudimenta in linguis, aber überus
expedite lingue, in literis et rebus sacris nitt ains hallers wärtd. So
er der man worden ist, wil ich witer nachifragen. Ich glob, er wärd
eer zuo Baden inleggen wie Christizanus [!] Berre zuo Ilantz.
Hüt acht tag uff ainem capitel hatt Castelmur in Thomleschg
zuo Katz geprediget so unghür und schantlich, wann es ist uffgschriben,
das er ins rächt ist kummen mitt gantzem Thuomläschg [!]. Den ersten
tag ist er nitt erschinen. Uff fritag wirdt der ander tag, wirt wunder
ainen hüpschen handel uss geben für Utz Eggstain in d' "Schelmenzunfft".

--609--

Min allerliebster Huldrich, lass disen botten nitt leer kummen, das wir
doch etwass gwisses von Baden innen wärdend. Diser bott solt vor
achtag dir den brief och geben han; do ward er in der stund kranck,
als er hinweeg solt. Ietzimal nitt me dann: gott sige in allem mit üch
allen. Gruetz mir alle bruedär.
In il uff Zinstag morgen in pfingstfirtagen.
Blasi zuo Melans [!] predigt als vast als vor ie; wann uff dem
rächten ist nieman wider inn erschinen. Es staat noch wol.
Gott der helff sinem wort, Amen.
anno 1526.
Din gantz ergäbnär
Iack [!] Saltzman.
An maister Uolrichen Zwingly zuo Zürich.