491

<< Nr. 490 | Index | Nr. 492 >> 

Absender: Vadian, Joachim

Empfänger: Zwingli

Ort: St. Gallen
Datierung: 25 V 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 615-616

--615--

Salve, vir doctissime.
Dictu mirum, quam nunc adversarii illi tui sese efferant frivole,
quam plaudant pueriliter et quam strenue encomium victoriae praevortant.
O immortalem deum nostrum! unum horreo, ne magnum
malum daturus sit fucus iste, non sane tibi tuisve, sed his, qui per
imperitiam et inscitiam nihil non admirantur. Hoc die ad nos allatus
est libellus quidam, qui dogmata tua, undique excerpta pro libidine,
Eccii responsionibus praeponit et veluti dialogi fabellam texit; eum
te dudum accepisse ab fautoribus tuis puto. Quid illi respondeas,
cum satis sese ipsum Eccius prodat tremulo calamo, vili depulsione
et longe maxime prostituta conscientia? Sed de Eccio et suis piget
scribere. Solius Oecolampadii me miseret, cuius sincerissimae aures
Thersitas illos et Stentores tanto tedio sustinere, pauxillo fortasse
fructu, compelluntur. Sed praestiterit fortasse et hos sustinuisse, quo
magis demum sophisticę tergiversationi sese candor veritatis ausit opponere.
Certum est enim apud me victorem abiturum ex illa harena
Oecolampadium, etiam si victus videri debeat coryphaeis quibusdam,
qui triariorum pugnam ab ocio illius et maturiore deliberatione
tandem erupturam esse non cernunt. Sed de Bernensibus quid acceperim
magno dolore, exemplo tibi indico literarum, quas Bernensis
quidam ad scultetum (arbitror) Lucernanum scripsit ad Baden;
quibus quoniam deest inscriptio nomenque nec satis rei gestae argumentum
cohaeret, parum fidei adhibeo. Precor tamen te (quando id

--616--

magni referat), certiorem me facere de ea re illico velis neque sane
expensis parcere, quo nobis ad manum sit, quo certa fide aut interpretari
factum aut mendacium confutare pro veritatis defensione possimus.
Misimus hactenus senatorios viros duos, quibus commissum, ne
quid aliud ad illos referant, quam quod frequentissimis suffragiis decretum
est, nempe placere nobis disputationes, quae veritatis vestigandae
gratia fiant; interim nos accepturos defensurosque, quicquid
aut illic aut alibi clarę scripturę testimoniis nititur. Summopere mihi
consultum videretur, ut Constantiam et Argentoratum evocares in
stativa, ut scilicet in promptu calamum haberent paratum in omnis
hypocriticę ostentationis confutationem, quo non tu solum, qui longe
gravioribus sat esses fortis, sed praeter Oecolampadium etiam illi
subsidiaria auxilia libellis suis mitterent, quibus palam denegata est
hactenus disputandi copia.
Vale et illico, si potes, nos de rebus omnibus facito certiores.
Nuncio nos liberaliter consulemus, quemcunque miseris.
Apud sanctum Gallum 25. Maii anni MDxxvj.
Ioachimus Vadianus vere tuus.
Domino Huldricho Zuinglio suo.