505

<< Nr. 504 | Index | Nr. 506 >> 

Absender: Oecolampad, (Johannes)

Empfänger: Zwingli

Ort: Basel
Datierung: 12 VII (1526)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 657-659

--657--

Gratiam et pacem per Christum.
Non est, frater charissime, quod hostium metu minus aperte, quę
opus, literis commendemus; sed interim consentiamus, ut dominus docuit
[Matth. 5. 25], adversariis, ne illi negocium facientes iudici tradant
et impediatur euangelii cursus; ut salutationem in via discipulis vitare
[Luc. 10. 4], ita et nobis supervacaneas literas non scribere consultum.
Et iterum nihil nobis formidabile, sicubi postularit usus, quandoquidem
et mors lucrum nobis erit [Phil. 1. 21]. Neque tu aliter in gratissimis
literis tuis admones. Responsum est τοῖς ἡμῶν πρεσβεῦσι. Exemplar

--658--

a scriba Lucernano, opinor, in ordinem redigendum et comitiis proximis
cum antitypo conferendum per nostrum notarium et sic communicandum.
De auferendis autem "Novis Testamentis" nihil audivi, quod
decretum, et proinde parum amice exceptus est libellus, quo contra
Fabrum id cavere studes, id quod pridem intellexisti. Optime placet,
ut commonefiat ecclesia, quid sibi liceat in iudicandis dogmatis. Sed
libellus tuus in eum usum conscriptus mihi redditus non est; quem
fac, ut quam primum accipiam. Literas enim tuas solas reddidit
Wilhelmus.
Porro nostri in sua perstabunt sententia, ubi in proxima venerint
comitia, neque nos amovebunt officio nondum lectis iis, quę disputata
sunt. Atqui interim novo a Spirensi comicio rumore terrentur meticulosi
et imperiale mandatum res novaturum putant, cuius exemplar
mitto. Sic Christus nunquam suos securos esse vult, quamvis non
multum me movet [!], quę hinc inde minae; sed pusillanimi gregis et
bona ex parte ad pristinas glandes propensi vacillatio suspiciones ingenerat.

--659--

Eius itaque fuerit incrementum dare, qui plantare rigareque
nos pręcipit [1. Cor. 3. 6ff.]. Hunc oremus.
Scribenti haec Cratander fascem attulit literarum, quas nunc
simul mitto. Tu cognosces facile, quid sibi velint, neque meo consilio
eges. Equidem non video, quomodo, Luthero si non respondeatur,
nos fidos Christi ministros fateri audeamus? Bucerus sapientissimum
consilium dat, cuius ad me literę tuis iuncte ̨sunt. Monent
Bavari cuiusdam literę, Lutherum dixisse, una opera omnibus
nobis se velle respondere, ubi satis insanitum fuerit. Est et hoc
specimen, cuius spiritus sit. Epistola eius ad Rutlingenses cum
nuncio Argentinensi periit. Pars ea, qua nos perstringimur, descripta
mecum est. Mittam illam, si quidem tibi opus fuerit. Non
enim totam descripsi. Pyrkaymerus minacissimus est et probationem
spiritus mei interminatur atque turbas per me excitatas. Quid
dicam? Iratus est et terrere vult. Atqui nos spectemus, quid dominus,
ferianturque, qui merentur. Melanchthon Pyrkaimero dixit,
‹nisi scripsisset, se voluisse scribere". Id quod in gratiam illius
arbitror dictum.
Iustus Ionas scribit Bucero: "Adnitar pro viribus, ut de
pace hic cogitetur. Incitas enim plane currentem; sed hanc doctrinam
non probabimus". Vides, ut omnis mundus seviat. Sed fortissima
est veritas. Cura, ut Capitonis literę ad dominos Helvetios
reddantur per commodos nuncios.
Et quid mihi faciendum, scribito. Parabo me ad scribendum
sequenti hebdomada, distincto "Syngrammate". Buceri literas ad
me mittito. Pręterea et Christophorus moneatur, ut maturet ea,
quae in Bilibaldum.
Saluta Pellicanum, Leonem, Myconium et fratres.
Vale.
Basileę 12. Iulii. Oecolampadius ὁ σώτατος.
Hulrico τῶ [!] Zwinglio, suo fratri.