507

<< Nr. 506 | Index | Nr. 508 >> 

Absender: Tscharner, Lucius

Empfänger: Zwingli

Ort: (Chur)
Datierung: 17 VII 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 662-663

--662--

Gnad und fryd von gott.
Erwürdiger, min lieber her und bruoder! Äwer nechst zuoschriben an
unseren pfarheren gethon, hand wir verstanden, mit fil guoter verkündung,
got sy lob, daß unß alle wol frëwt. Darby mir insunderß anzewgt von
einer dienstmagt oder köchin, deß min liebe frow trülich erfrëwt, und ich.
Ist unser trülich bit (ist sy noch Zürich) mit ieren red zuo halten, daß sy
sich fürderlich heruff schick; dan min frow byß Derene tag sol genesen
eineß kindeß, wilß got, und darnach in 8 wuchen werdend wir uff Bern
zuo reysen etc. - darmit sy min hußhab im selben zyt komly [!] reygieren.
Und wery unser trülich ernsthlich bitt: als bald ier gen Bern nechst schri=
bend her Berchtolden (sitmal mine schweger im also geneygt sind und
sy sich also christenlich erzëwgend), daß er red mit ynen hielty und erfary,
wie min handel stand, weß ich mich versechen selly; dan sy mir noch nie
kein buochstaben hand zuogschriben, und ich aber ier schwester so erlich und
wol halty. Ich sorg ymerdar, sy habind mich für ein gogelman etc.
Daß ier min her Berchtoltz anzewgung zuoschribend, und min frow und
ich danckend üwer erlichen frumen frowen trülich um ier mueg, so sy ge=
hept um die iugfrowen, und waß ieren von euch verheysen ist, wil ich
trulich halten und sy wol halten, on zwyfel, daß si fürderlich heruff komy.
Unser frumer bischoff und die andern brueder all land euch fast vil guotz
sagen, ouch gruezen, euch bitten, daß ier unß by Hanß im Har schri=

--663--

bend, wie eß wyter stand zuo Bern und anderstwo. Und gruezend unß
üwere frumy hußfrowen, Hilarium, sin frowen, ouch frow Murerin.
Vale.
Datum Zinstag nach Margrete anno 1526.
Üwer gehorsamer, williger Lucius Tscharner etc.
Dem erwürdigen heren, meyster Uolrich Zwinglin,
sinem insunderen lieben herren und bruoder etc.