511

<< Nr. 510 | Index | Nr. 512 >> 

Absender: Capito, Wolfgang

Empfänger: Zwingli

Ort: Strassburg
Datierung: 24 VII 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 669-671

--669--

Gratiam et pacem.
Fabri libellum nactus sum. Imposturas hominis nonnihil produxi
in apertum per libellum, quem senatus modo diiudicat; nam
literis Helvetiorum moti mihi praecipue gravissime indixerunt, ne vel
literas de hac re neque ad Helvetios neque ad principes scriberem
ipsis inconsultis. Lucernates duram epistolam secundo in me ad
senatum nostrum scripserunt, sed exemplum mearum ad te simul
miserunt. Unde mihi firmissima causa adversus quadruplatorem illum.
Adulteravit interpretatione, invertit ac detorsit glossematis omnino ad
contumeliam, incitavit Helvetiorum in me animos, nisi fallunt me

--670--

omnia, graviora illos in se propediem sensurus. Nam quę respondeo,
visum est mittenda esse pagis singulis. Ecquid amodo fidei
dabunt illi, qui contra fidem publicam autor fuit, ut clausae literae
aperirentur; deinde, qui interpretatione periculose falsavit; tertio, qui ad
calumniam vel dicta candidissime [!] rapuit; postremo, qui literas in me
Helvetiorum nomine instituit, quę duntaxat nunciis ac latoribus mearum
minitentur, et alias ad nostrum senatum clam me, quibus accusor
atrocissime et reposcor ad pęnam, adeoque illis minaciores magisque
vanas ad senatum imperii. Iam, gratia deo, vertentur rerum vices.
Qui me perdere statuit, periit plane. Consecuturum me spero, ut
optimi principes sint hominem falsarium amplius non laturi in senatu
atque consessu suo. Tantum vereor, ne conventus dissolvatur, priusquam
ex nostris meas nugas fuero consecutus. Deinde prelum dies
aliquot occupabit. Quo pacto verbum pergat, ex nuncio satis intelliges;
nam coram vidit omnia. Hessus iuvenis plane virum agit.
Saxo duos habet concionatores. Marchionis Badensis concionator
agit magnifice, praeclarissime autem omnium Hessi ecclesiastes.
Quae modo meditentur quidam, ut futura expectata, tibi, quia nuncius
hic obtigit, libenter participo; sunt enim argumentum divinę erga nos
bonitatis. Pherdinandus et episcopi si non desierint urgere cesareum
edictum et ita perrexerint odiosissimis technis verbum opprimere,

--671--

videtur foedus coaliturum inter respublicas et principes, nimirum
Saxonem, Hessum, Iuliacensem etc., neque deerunt potentissimi
comites. Quę quidem admodum secreta adhuc habentur. Cęterum
in literis interceptis nihil est periculi, postquam sum copiam nactus.
Magis stulte fortassis, quam scelerate scripsi.
Vale.
Argentorati 24. Iulii anno 1526.
Vuolfgangus Capito.
Huldricho Zinglio suo - Zirich.