519

<< Nr. 518 | Index | Nr. 520 >> 

Absender: Capito, Wolfgang

Empfänger: Zwingli

Ort: Strassburg
Datierung: 18 VIII 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 687

--687--

Gratia tecum.
Quę tu Fabro respondes, maiorem in modum me defendunt, et
gratia deo, quod ex coniecturis tam certum collegisti. Hodie misi
duo exemplaria Spyras, landtgravio Hassię, qui verbum mordicus
tuetur, et Iacobo Sturmio, nobili senatori nostro. Ii norunt hominis
vanitatem, et tamen graviter obtinuit, ut ex selectis esset, qui
totius imperii necessitates dispicerent. Tu meam fortunam, nam sic
loqui libet, boni consule! suo se astu ille impedivit. Duabus chartis
plus detexisti technarum Fabrilium, quam ego fortassis decem.
Spero fore, ut agnoscant tandem, qui sit, quo animo et qua fide agat
cum gente tua et nostris μωροσόφοις principibus. Nam subolescit
multis fraudulentia nebulonum, et imprimis Fabri. Audies, opinor,
iudicium domini mirabile: deiicietur ex arce existimationis in summum
contemptum.
Vale, mi domine et frater, et quę videntur in rem nostram, mone
fideliter, ut soles.
Argentorati 18. Augusti anno 1526.
Vuolfgangus Capito.
Huldericho Zuinglio, episcopo Tigurinorum,
domino et fratri suo observando.