520

<< Nr. 519 | Index | Nr. 521 >> 

Absender: Gynoraeus, Petrus

Empfänger: Zwingli

Ort: Augsburg
Datierung: 22 VIII 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 688-690

--688--

Gratia et pax a deo patre et domino nostro Iesu Christo.
En mitto ad te, eruditissime Huldrice fraterque in Christo
charissime, Eckianum de missae sacrificio figmentum iam recens
excusum, ea potissimum ratione, quod post Ludderum (ita enim toto
ferme libro hominem nominat, et in hoc uno a typographis peccatum
est, quod alicubi emendarint) neminem odiosius perstringat ac crebrioribus
insectetur conviciis, quam te. Sed quid non audent Thrasones
illi, quo principum aliquorum gratiam eblandiantur? O caecitatem,
Cimmeriis, ut aiunt, tenebris atriorem! Quo perveniunt tempora

--689--

nostra! Verum similes habent labra lactucas. Iam si qui inter legendum
occurrent barbarismi ac soloecismi atque id genus alia Eckianae
officinae ornamenta, quibus totus fere liber plenus est, ne nostrae hoc
oscitantiae imputes velim, quod plane nihil immutare consilium fuerit;
sed ut exemplar manu sua descriptum habuit, bona fide excusa sunt
omnia, nisi quod Augustanum senatum offendit nominatim. Ita mihi
visum est, quo dictio argumento tractando probe responderet. Dispeream,
si unquam quicquam ineptius legeris. Dictu mirum, quanta
virulentia tractet omnia quamque imbellibus adoriatur rem ipsam argumentis.
Et ita insanire oportet lumina illa orbis. Addidi huic libellum
quendam Germanicum, Iohanne Denckio quodam autore, qui hic
agit, Norinbergae proscriptus ob nescio quas factiones, homo mire
pestilens ac lubricus, qui non paucos seducit, ut sunt Augustani
curiosi. Et inter caetera dicit scripturam minime nobis necessariam;
demones in fine eciam salvandos, iuxta Origenis dogma; nec ullam
adhuc esse ecclesiam; et ut in summa rem intelligas, e rebaptisatis
praecipuus est. Haec partim ex eo audivi, quanquam nebulo post
mutarit verba, partim ex aliis, et nominatim ex Baldasare Pacimontano,
qui mira de illo homine retulit, quam pestilentia prae se
ferat dogmata. Dein, ubi ego eum, Baldasarem videlicet, opinabar
solvisse Augusta, convenerant simul; quid tractarint, nescio. Hoc
unum me non fugit, quantumvis recantarit Tiguri, opinionem suam de
baptismo minime sibi displicere. Rogavit me, cum Augustam venerat,
quo [!] adirem secum concionatores, quos antehac nondum salutaram ob
mutuam dissensionem super eucharistia. Haud gravatim homini parui
ob simulatam humilitatem; at ubi in congressu viderem vafriciem, et
quod te procinderet ac velut tyrannidis in eum exercitae insimularet,
mox adserto tuo honore hominem acriter obiurgatum reliqui, cuius rei
non paucos adnumerare possem testes. Sed quicquid sit, plerosque
suae farinae apud nos fere permovit, ut crederent. Sed quid attinet
haec referre? Caeterum legi proximis diebus litteras e Witenberga

--690--

Augustam missas, quibus intellexi Lutherum in te scribere in utraque
lingua, nempe Germanica et Latina; que res, si ita est, mihi
admodum dolet ob emulos nostros, qui, ut plures sunt, ita sane
potentes, quanquam non nesciam deum nostrum, cuius causam agimus,
longe potentiorem, qui dissipabit consilia gentium et ad nihilum
rediget [Ps. 33. 10].
Vale, mi charissime Huldrice, ac Petrum tuum tibi commendatum
habe ac tuis semel litteris exhilara, ubi a severioribus paulum
feriatus fueris negotiis. Sigismundus Grymius plurima te cum
Leone nostro salute impertit. Homo ut est totus candidus ac pius,
ita mire tibi favet, ac eciam cupit commendari. Huius unius liberalitate
ego hucusque Augustae maneo, alioquin non diem unum mansurus,
quod mei mores ac Augustanorum ex diametro pugnent inter
sese. Proinde tu aliquando mei memineris, oro, quippe cui inurbana
urbanitas ac parum festivi mores notiores sunt, quam ut depingam.
Leonem meum plurimum meo nomine salutabis dicasque me litteras
suas suavissimas recepisse; dein Pellicanum nostrum ac Myconium.
Ubi Eckianas legeris nugas, tu eas Leoni nostro communicato.
Vale iterum.
Tumultuarie ex Augusta Vindelicorum 22. die Augusti anno
1526.
Vix vacabat, ut cursim relegerem, urgente nunctio.
Petrus Gynorianus tuus ex animo.
Adiunxi tuis libellis hunc, quem Oecolampadio ordinavi. Tu,
ut primum poteris, transmitte, missurus quoque Volphgango Capitoni
et Bucero Argentoratum; quare librum tuum penes te servato.
Huldericho Zuinglio Tigurinae ecclesiae episcopo vigilantissimo,
fratri in Christo charissimo. - Zurich, meister Vrich.