521

<< Nr. 520 | Index | Nr. 522 >> 

Absender: Kunz, Petrus

Empfänger: Zwingli

Ort: Erlenbach (Bern)
Datierung: 24 VIII 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 691-692

--691--

Gratia et pax a deo patre etc.
Tandem et ego ausus sum Zinglio aures suas molestare, quem
alias in mille occupationes sat scio distractum. Quae fiducia eiusmodi
facinoris me ceperit, ne mireris quidem. nam tu qui sis, amplius
ignorare non debeo, posteaquam Eccium ipsum de te verba sua
resonantem audivi. Caeterum gratas tibi gratias, mi Zingli, agere
debet epistola mea pro libellulo, quo nuper per equitem quendam
Bernatem me donare dignabaris, quo, te authore et datore, iure
glorior, eundemque legisse oppido operaeprecium erat. Nam haec erat
mihi preciosa tritici mensura [Apok. 6. 6], quae equidem in tempore
venit. Faxit deus optimus maximus, ut longęvo tempore hoc mensore
fruamur. Porro indies nunc nova fata moramur miseri Bernates.
Nam clanculariae nunc apud nos spirant minae quosdam scilicet Ioakimos
[Jer. 36. 21ff.] brevi ostiatim disquisituros, si forte apud quempiam

--692--

nostrum eius generis libellos inveniant, quorum aspergine veneranda
relligio [!] nostra iamiam tam ęgre pallescit. Quibus inventis
ultrices flammae vel semel imponant silentium. Hic tu tibi caveto,
Zingli, ne quo [!] eiusmodi farinae libelli apud nos offendantur, qui
te autorem prodant, quandoquidem propter te alioquin multi pessime
audiamus, dum multi Neronum nostrorum hoc sibi iam certo persuasum
habent simplicia ingenia nostra nunc maxime per te seductum iri,
esseque te unum et solum, cuius ope exicialis Christianismus ille
vires sumat. At tibi nihil sint curae ranae illae (quantum ad nos attinet);
surdis enim auribus pręterimus illas. Tu semper contra audentior
ito, et nos in orationibus nostris tibi nequaquam deerimus. Sed
receptui cano, ne meis fabulamentis tibi bonas horas suffurer.
Bene valeto.
Ex Erlenbachio XXIIII. Augusti anno 1526.
Non sum scriba; ideo ignosces, scio.
Petrus Conzenus, ad aram usque tuus.
Huldricho Zinglio, Christianissimo Tigurinorum episcopo.