53
Absender: Rhenanus, Beatus
Empfänger: Zwingli
Ort: Basel
Datierung: 26 XII 1518
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 123
--123--
Beatus Rhenanus Zuinglio suo S. D.
Nudiustertius huc a Bernensibus missus est bibliopola, qui
multum hic Lutherianorum exemplarium coëmit et illo deportavit.
Gaudeo, mi Zuingli, vehementer, quoties video mundum resipiscere
et abiectis mataeologorum [cf. Tit. 1. 10] somniis solidam consectari
doctrinam. Idem a meis municipibus factum est. Quo magis miror
Thuregiensium negligentiam, qui moniti per te facere cessent, quod
alii sua sponte capessunt. Sed haec est hominum natura: quod iubemur
aut ab alio monemur, segnius obimus; quod nobis autoribus agimus,
ad id alacriter procurrimus. Neque enim credere possum, te illos
aut non monuisse, aut rem non successisse apud eos, qui tibi in
iudicando primas tribuunt.
Bene vale.
Basileae, postridie natalis dominici anno m.d.xviii.
Eximio viro domino Huldericho Zuin[g]lio, utriusque linguae
[perito,] amico incom[parabili.]