559

<< Nr. 558 | Index | Nr. 560 >> 

Absender: Haller, Berchtold

Empfänger: Zwingli

Ort: Bern
Datierung: 17 XII 1526

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 805-806

--805--

Gratiam et pacem a domino. Charissime Huldryche
Lucii negocium, quam fęliciter transactum sit, ipse coram referet.
Senatus noster cum diacosiis in festo Andreę decreverat, ut hepdomadatim
per Adventum et Quadragesimam solitis contionibus tres
adderem. Quod cum paratissimo animo suscęperim, urgent non nulli, ut
cooperator mihi iungatur; quem cum ex Bernatibus omnino habere
non possim, opus erit, ut pro fratre extraneo laboremus. Commodissimus
autem huic provincię subeundę esset Franciscus Kolb.
Sed id obstat: undecunque mihi assumam cooperatorem, patrię respectus
tantus est aput oligarchas, ut quam primum utrunque amandent
rusticorum et Helvetiorum suffragio, quemadmodum et novissime
attentatum erat, et cum Sebastiano Meyer itidem contigit. Sic
enim verbum domini quotidie crescit, ut non credam, diacosiorum
decreto quippiam posse in contrarium agi. Tu igitur consule quantocius
poteris, et age, ut hactenus semper, pastorem pro nostra ecclesia
mire sollicitum. Paratus sum ego fratrum consensu hepdomadatim
quattuor contiones habere etiam extra praefixum tempus, quo sermo
domini fortius currat, et animatiores reddantur hi, qui nunc sunt cordati,

--806--

iis vero colla non nihil confringantur, qui nunc omnibus viribus
adversantur. Num igitur melius sit me sic agere aut mox pro cooperario
laborare, tu iudica. Paratus sum obsequi. Cęterum hac hora conveni
Tilmannum e Lucernanis comitiis redeuntem, e quo tantum percępi,
quod Helvetii acta disputationis iam sub prelo sudantia excusa
omnino dare velint. Spero equidem Bernates non accepturos,
nisi addito originali, cum quo saltem impressum conferre liceat. Quicquid
tibi visum fuerit, nobiscum procul dubio communicabis. Guolfgangus
a Madiis et Thomas noster Wyttenbach ad superos
concesserunt.
Vale.
Ocyssime 17. Decembris, Bernę anno 1526.
Salvus sit Röstius, Leo, Megander et omnes.
Salutant et te Trempius, Nollius, Haggius, Wattenvillii,
Tilmannus et omnes.
Berchtoldus Hallerus, ex animo tuus.
Fidelissimo mysteriorum dei dispensatori Huldricho Zuinglio,
suo in domino maiori et fratri charissimo.