56
Absender: Glarean
Empfänger: Zwingli
Ort: Paris
Datierung: (I/II?) 1519
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 130-131
--130--
Vldrico Zinglio Glareanus S.
Scripsi nuper copiose, quaecunque in buccam veniebant, charissime
Uldrice, quadam muliere auferente specilla in Helvetios; nunc
igitur pauca quasi subternotabo. Constans fama in Francia est
Germanorum proceres titulosum hoc imperium Franco vendidisse - neque
enim soli Helvetii pecuniam amant, quamquam et hi amant - tum
Francum minitare gentibus iugum et servitutem, quippe qui
resistentem neminem habeat. Vereor, ne Germanos probe noscat.
Ab Agrippina motus orietur, opinor, et Ferdinandus illi invisus
propter suspectam Caroli fratris potentiam. Omnino rerum quaedam
non parva mutatio animo meo obversatur, quam utinam praesagirem
Nam quam tutum sit mihi in Galliis, non video. Omnino ultra
annum hic non manebo, quamquam omnia mecum bene habent. Te
rogo mihi rescribito! Desydero enim responsum de rebus plurimis,
quas nupera epistola scripseram. Nuntius hic certus est et mihi multum
familiaris.
Vale, et Osaldum nomine nostro salutabis; nam et te Osaldus
salutat, tu Myconium, te Elmerus. Atque utinam fortuna me a
--131--
spe mea non deiecisset! sensisset Osaldus non amicum modo, sed
etiam Mecaenatem. Sed hoc Zophio τῷ ἀγερώχῳ debeo.
Vale, mi Uldrice; tibi persuade nihil aeque mihi in votis esse,
quam ut sim tibi charissimus.
Lutetiae anno Christi M.D.XIX.
Vldrico Zinglio, ecclesiae Tigurinae parocho,
viro eruditissimo iuxtaque integerrimo.