562

<< Nr. 561 | Index | Nr. 563 >> 

Absender: Oecolampad, (Johannes)

Empfänger: Zwingli

Ort: Basel
Datierung: 23 XII (1526)

Vorlage: Huldreich Zwinglis sämtliche Werke, vol. 8 (Leipzig: Heinsius, 1914) (Corpus Reformatorum 95), 814-816

--814--

S. in Christo. Mi Huldrice
Resignavi litteras tuas ad fratres Argentinenses, et placet
tandem aliqua via communicandam orbi disputationem. Sed bonus
ille vir, Murnerus, dignus est, cui commendetur. At expectabimus,
qua fide provincia sua fungatur. Nostrates parvam inde gloriam
tracturos vereor, et certe non tam nostro, quam illorum nomine, utcunque
de me sentiant, doleo. Poterimus enim parvo labore, quicquid
in nos comminiscuntur vel statuunt, declinare, ut euangelicę
causę non solum non obsit, sed et prosit. Utinam statim exemplar
indipiscamur! Iam quomodo satis laudabo Sanctogallensium exemplum
in abolendis imaginibus et missis! Nos hic conamur. Sed
maior est ira dei, quam ut verbo efficiamus aliquid. Ferendum nobis
iudicium domini, donec magis propicius fiat. Adversarii nostri semper
impune sua mendacia docent ac prędicant, et est populus, qui diligit

--815--

talia. Satis interim sit bonam partem pure Christo favere. Nuper
amicissimis literis a suffraganeo Frisingensi petebamus, ut ex
scripturis vel doceret vel nos audiret docentes de his, quę de iudicio
ecclesię plebi dixerat, et nos fere periclitati fuissemus. Ita nulla via
est, qua redigantur in ordinem, qui nobis contradicunt. Plerique nunc
liberius docemus, ut vel accusatos convincere cogantur. Sed surdis
fabulam. Tu si quam viam excogitare potes, ut hic tandem concorditer
doceatur Christus, fac sciamus. Inter nos quinque satis
convenit, ut quique pro suo virili nihil intermittamus, quod ad gloriam
Christi attinere videtur. Hoc semper impedit, quod pseudoprophetę
contra nos foventur.
Fratres Argentinenses sępe scribunt, ut moneam amice, ne
Lutherum, ut meretur, tractes, sed ut nostra, hoc est euangelii
causa, poscit, quę modestos ministros cupit. Verum mihi apud te
hanc provinciam subire supervacaneum videtur. Moderaberis ipse
stilum. Quid gravius dicere poterit Lutherus, quam quod nunquam
serio Christum vel cognoverimus vel docuerimus? Non licet igitur
tacere, sed minus expedit iniuriam retaliare. Spiritus Christi te
ungat et doceat. Mittito nobis, quod Struthio respondisti.

--816--

Vale.
Basileae 23. Decembris.
Tuus Oecolampadius.
Hulrico Zwinglio, Tigurinorum pastori,
suo dilecto fratri. - Zurch.