567

<< Nr. 566 | Index | Nr. 568 >> 

Absender: Ritter, Erasmus

Empfänger: Zwingli

Ort: Schaffhausen
Datierung: 1 I 1527

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 2-3

--2--

Graciam et pacem a deo per Iesum Christum etc.
Tuas ad me destinatas literas hisce diebus accepi easque sumo [!]
gaudio perlegi, lectione item exploravi, et ecce spirabant, quod inprimis
gratissimum mihi erat, Zuinglii in exhortando modestiam, in euangelico
negotio promovendo sedulitatem et - quid pluris? - sincerum Christianissimi
pectoris candorem, quo factum est, ut ille paterne adhortaciones
tue tam nichil molestie mihi afferre potuerint, quod eciam hibleo melle
dulciores suavissimum cordi praebuerint odorem. Ardes vero (solito more),
quatinus sermo domini velociter multo cum foenore curreret [2. Thess. 3. 1],
id quoque anxius in dies precor, et ut regnum illud Baaliticum penitus
demoliretur, sincera vero pietas Christianaque libertas cordibus omnium

--3--

insereretur; huius ergo laboris indefessum ministrum in mortem usque
me fore non dubites, in quibusdam vero externis ceremoniarum ritibus
non licet usque adeo festinare, quamvis omnia, quae papam sapiunt
atque fidei obsunt, (ut fere omnia, quae hactenus papa et concilia
tradiderunt), quantocius potuero, eversum iri conabor. Queris vero,
quidnam in causa siet, cur segnius rem aggrediar. En et in hoc tibi
satisfaciam lubens; non dubito, quin res te lateat. Sebastianus
Hoffmeister, qui ante me hoc munere apostolico in ecclesia
Scaffusiensi fungebatur, pio licet zelo (ut reor), suma[!] vero et
inaudita mordacitate fecit, ut in ipsis liminibus aderat extinctio tocius
euangelii. Ille bonus vir dum prodesse cupiebat, tanto fuit incomodo [!],
ut nemo magis potuisset, nec eciam regnum illud papisticum cum
omnibus satellitibus suis, et si licet quidam sint, qui hoc idolum,
papam Antichristum, iam denuo pristine potestati (animas perdendi)
restituere conantes, animalia videlicet ventris, nichil tamen efficere
possunt; ego enim me murum ponam pro Israel, deus optimus
maximus de die in diem gratiam abunde suppeditat [2. Cor. 9. 8].
Ad hoc vero certamen maiori opus est prudencia, quam si nunquam
sane doctrine quid percepissent; nam suma [!] modestia omnia sunt agenda
inposterum; illico illis in mentem revocatur sedicio proxima.
Ceterum quae tibi tabellio is mea causa annunctiat [!], ac si me
coram audires, accipito, praesertim ex parte muliercule cuiusdam, qua
in re tuo et auxilio et consilio opus erit.
Vale.
Ex Scaffusia 1. die Januarii MDXXVII etc.
Misisti xenium tam gratum Erasmo, quod omnibus opibus atque
eciam Croesi ditissimi praestat; at ego, quid dignum tibi reddam,
inscius sum. Indigne sunt litere omni barbarie referte tanto viro
muneris loco; sed Erasmum tibi filii loco do et dedico; hunc argue,
increpa et experiris tibi observantissimum.
Salutat te Gaspar Tonsor, qui mecum laborat in euangelio
Christi etc.
Erasmus Ritter, tuus etc.
Sincerissimo verbi ministro, Huldericho Zuinglio, Tiguri
euangeliste, patri suo inprimis observando.