578

<< Nr. 577 | Index | Nr. 579 >> 

Absender: Capito, Wolfgang

Empfänger: Zwingli

Ort: Strassburg
Datierung: 22 I 1527

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 25-26

--25--

Gratia tecum.
Iudoco ex me Christum pronubum nuptiarumque ducem precor
- nam audio rem peractam - similiter puellę, beneque ominor, inter
se amanter et pie cohęsuros. Seniori Brenwaldt, parenti iuvenis,
si in illum incideris, plurimam imperciaris ex me salute (!). Refer
Pellicano, ut commentaria bibliorum servet; me ipsi in solvendis,
si dominus dederit, fore adiutorem; nam eadem nunc domi habeo et
plus satis ęre alieno etiamnum gravatus sum. Struthioni suas
indidisti poenas; pulchre ornatus iam in medium procedet. Principi
tuae perferentur brevi; nam hospiti, qui ad me pertulerat, parum
commodum videbatur. Simili gravitate Luthero congredere et cautim,
mi frater, quia gens pernitiosissima catabaptistarum viro plus satis
iniqua est. Verum nos perstamus, cuique maneat sua laus, ne maligni
esse malevoli ac detrectatores ecclesiis videamur. Optarem modis
omnibus depugnatum esse bellum hoc vehementer intestinum. At
classicum domino canente in aciem est animose succedendum; ipse
tandem componet, ubi satis fuerimus exerciti. Hic est rumor, Felicem

--26--

Mansium tuum plexum suplicio et mortem obiise magnifice, quo
nomine pietatis ac veritatis causa, cuius partes tu agis, sit magnopere
degravata. Quicquid est, scire me referet, ut vel refellere vel declinare
obiecta commodius liceret. Aperta nobis spes est meliorum ex novo
nostro magistratu; nam hactenus ad puriorem usum perrumpere dominus
necdum dedit. Quę feruntur de Luthero nunc remoto a
concionibus sacris, ut in te et Oecolampadium scriberet, puto vana
esse; nam quid scribet, quam Christum hominem esse ubique, totum
in toto mundo et in qualibet parte totum? Ludo in re seria et tristi;
sed adeo desipit modo, quasi orbis pios nullos haberet, quibus experimento
constaret iudicium Christi per spiritum a patre collatum.
Dominus te servet.
Argentorati 22. Januarii anno 1527.
Uxorem et liberos iube ex me valere in domino.
Capito, tuus.
Huldericho Zvinglio, episcopo Tigurinorum,
maiori suo in domino.