605

<< Nr. 604 | Index | Nr. 606 >> 

Absender: Capito, Wolfgang

Empfänger: Zwingli

Ort: (Strassburg)
Datierung: 8 IV 1527

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 87-88

--87--

Gratiam Christi.
Quanto animo hic legatur "Exegesis" tua ad Lutherum, dici (!)
nequeo, adeoque ipse vehementer admiror temperatum acumen et
lenem constantiam in causa tam odiosa. Quod si ita fore praescissemus,
parsisset chartis Bucerus. Interea tamen varia dominus
revelat, quorum gratia praestare videtur, ut mature inter nos commentaremur,
quod literis inter absentes tam commode fieri nequit,
tametsi summa ipsa egregie constat. Iterum lectionem exegeseos
repetentes adnotabimus, quę putavimus praemunienda, si quę occurrerint,
eaque simplicissime indicabimus. Historia Mansii descripta est per
te diligenter et vere, quam in istum geri ac fieri domino visum est,
et nos perspicimus satis, quam coacte senatus iudicis partes tandem
usurpaverit. Hic agminatim prodeunt peioribus dogmatibus instructi.

--88--

Praecipua autem cura istis nostris est, ut verbi autoritatem excindant.
Nunquam cogitatione consequi potuissem, quę coram experimur.
Tentatio domini gravissima est. Quod enim per tyrannos Satan, id
ista infami hominum pertinacia praetextu amoris erga religionem
conficit, nimirum ut alibi vi et hic ingenio verbi usus eliminetur.
Verum enimvero fore confido, ut omnia in dei gloriam cedant. Virum
hunc ceu insignem confessorem Christi tibi commendo; nam carceres
ob Christum pertulit et causa verbi fere in octo milibus aureorum
multatus est. Queso amice hominem, si vacat, compelles.
Vale.
8. Aprilis anno 1527.
Vuolfgangus Capito.
Huldericho Zuinglio suo - Zurich.