609

<< Nr. 608 | Index | Nr. 610 >> 

Absender: Oechsli, Johannes

Empfänger: Zwingli

Ort: Elgg
Datierung: 27 IV 1527

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 106-107

--106--

Gratia tibi et pax a deo per Iesum Christum, dominum nostrum.
Tametsi compertum habeam, charissime frater, in republica
Christiana quam sis occupatissimus, non potui non ad te scribere
de rebus nostris. Ecclesia Elguviana nostra a sacrificulis ob
actionem mense dominice nuper veneranter habitam non immodice
turbata, quod sermonibus et actioni nedum defuerint, sed et vocati
publice contradixerint, oratores ad senatum Tigurinum mittit, cum
instructione, cuius copiam ad te perferendam dedimus. Videbis, quas

--107--

insidias nebulones isti contra Christi verbum, quod tu, tuique et ego
pariter predicamus, moliantur. Nam quicquid a me publice suggeritur,
id in angulis subvertunt apud simplices [Mt. 10. 27], conniventibus ad id
eciam primoribus nostris, eiusdem farine hominibus. Quodsi senatus
Tigurinus audaculos illos non conpescuerit vel, si quid habeant
dextrum in nostram doctrinam, conferre iusserit aut omnino amotos
fecerit, periclitabimur maxime. Quid enim possumus in nugas suas
istas? Tu igitur, charissime frater, pro Christi et nostro amore
rebus nostris apud senatum consule vel apud quosdam, quos noveris,
qui pro sua sinceritate in rem nostram aliquid possint. Nam ecclesie
nostre sanior, que et maior, pars non modicam in te fiduciam habet;
que voluit, ut ad te nomine suo scriberem. Et fac pro candore tuo,
quod in te fuerit. Uxor mea et ego mediocriter vivimus.
Tu cum uxore tua vale.
Theobaldum Geroldzecium, moecenatem nostrum amantissimum,
et sororium nostrum Franciscum nostro nomine salvos iube
et admone, ut ad nos concedant, aut nos ad ipsos, cum per ocium
liceat, aliquando concessuros.
Ex pago Elguviano vicesima septima die Aprilis anno xxvij.
Tuus Ioannes Bovillus.
Huldrycho Zuinglio, ecclesiasti Tigurino vere pio,
fratri charissimo.