63
Absender: Rhenanus, Beatus
Empfänger: Zwingli
Ort: Basel
Datierung: 8 III 1519
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 144-145
--144--
Beatus Rhenanus Zinlio suo S. D.
Dedit tres libellos Petrus Gebwilerius doctori Michaeli Sanderio,
videlicet exhortationem ad principes Germaniae, ne consentiant
ad decimae praestationem, quae sic incipit: "Si unquam Germaniae
principibus consilio, prudentia concordiaque etc." (eandem
Germanice), et orationem, hoc est Leodiensium querelam, quos
mihi interim describendos clanculum cures, dum hic, qui literas has
tibi reddidit, divam Virginem Eremiticam visit. Non est multum
scripturae. Germanicam orationem inprimis habere cupio. Libri
dn. Michaëlis sunt elegantissime concinnati, quemadmodum Gebwilerius
coram exponet, qui intra biduum iter inibit. Vector ille,
de quo scripseras, nos rediens fefellit. Idem, qui has tibi reddidit,
civis et bibliopola Parisiensis, a Glareano literas mihi attulit, in
quibus scribit, magnopere Germanis minari Gallum Elvetiorum
fiducia, quos putat sibi non defuturos. At nos speramus illum frustratum
iri. Non conferent auxilium ad eos subigendos, qui si sub
iugum missi fuerint, ipsis quoque domitoribus tyrannis imminebit et
--145--
servitus. Non destituant se invicem Germani, si sapiunt; Francum
non admittant, sed prohibeant potius! Nam si hic vel exiguam aliquam
provinciam occuparit, non ante desinet, quam quicquid ea vicinum
circumplectitur, in suam redegerit potestatem. Vetus dicterium est:
melius est Francum amicum habere, quam vicinum, quod etiam
Graece fuit enuntiatum, nimirum ut apud Graecos natum, quo tempore
Syriam et Graeciae partem Gallicani reges administrarunt,
ut docent chronica abbatis Auspernensis: Κρεῖττον τὸν Φράγκον
φίλον ἔχειν ἢ γείτονα, aut similibus verbis; nam liber ad manum non
erat. Saluta dn. Osualdum Myconium et ceteros amicos.
Bene vale, mi Zinli, et eum, qui has tibi reddidit, ad me sine
libellis illis tribus venire non sinas
Basileae. 8. Marcii anno M.D.XIX.
Eximio viro dn. [Hu]ldericho Zinlio, [par]ocho Thuregiensi,
[am]ico singulari.