64
Absender: Zwingli
Empfänger: Rhenanus, Beatus
Ort: Zürich
Datierung: 9 III 1519
Vorlage: Huldreich Zwinglis sämtliche Werke, vol. 7 (Leipzig: Heinsius, 1911) (Corpus Reformatorum 94), 146-147
--146--
Beato Rhenano Ζýγγλιος S.
Attulit retroactis quidam diebus scedulam, carissime Rhenane,
a Matthia, librorum complicatore, percunctante, suillis an vitulinis
tergoribus libri Sanderi essent pręmuniendi. Parum hoc referebat,
nisi forte hanc morę quęstionem pretexuit. Quod si libri aduc nudi
sint, suillis vestiat tergoribus; nam Sanderum interea pertedet proximeque
rogavit, num protelatio istec argenti penuria fieret, decem florenos
offerens, quos ego recipere nolui, testatus incommoditatem aliquam
intervenisse, non diffidentiam. Itaque homo desiderio dehiscit.
Te igitur precor, calcar pigriculis indas. Sat habes nunc.
Dedit idem Sanderus hisce diebus orationem nobis hominis
cuiusdam ἀνωνύμου, docti tamen adprobe et festivi, verum descriptoris
ignorantia improbe scriptam; quam aliunde quoque missam, et per
quendam illatinum, omnino non modo ignarum scriptam, cum Myconio
restituere nitimur vel cuidam integritati. Quod ubi factum fuerit, ad
te mittetur; placebit supra modum, adeo est referta scommatis κατὰ
--147--
τοῦ ἱερέος [!] καὶ τῶν καρδιναλΐων ἀργυροφιλτάτων, ὁ δὲ καρδινάλιος Σεδουνήων
εἴπε [!] πρὸς ἐμὲ, ἄγχι σχὼν κεφαλήν: cura, ut prematur per
Frobenium. Hęc igitur, ubi aliquantisper repurgabitur, tibi mittetur;
inde tuo facies omnia arbitratu. Quidam dixit Sandero, esse
Hutteni; si videro Sanderum non egre laturum, mittam clanculum
omnem rem vel cum pulvisculo. Hactenus enim noluit alicui hominum
quam nobis credi; immo Myconium ignorat nobis communicare, quod
scilicet magister cęremoniarum fuit in curia Leonis, μὴ λέοντος.
Vale.
Salvi sunt Frobenii, Amorbachii, Fonteius, omnes nostri,
dum tamen Fonteius curę pro nobis nihil remittit.
Ex Tyguro VII Idus Martii etc. MCCCCCXVIIII.
Eruditissimo viro Beato Rhenano, suo amico.