634

<< Nr. 633 | Index | Nr. 635 >> 

Absender: Capito, Wolfgang

Empfänger: Zwingli

Ort: (Strassburg)
Datierung: 9 VII 1527

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 171-172

--171--

Gratiam et pacem. Charissime Zuingli
Superioribus diebus de libro tuo, quanto hic favore excipiatur,
scripsi. Non minori animo adversarii amplexuntur [!], quicunque nondum
perfricuerunt frontem. Nam senatus super dogmatibus baptistarum
evellendis cogitat. Tres pridie ducti sunt ad publicas custodias.
Est inter eos nebulo aliquis deses ac ignavus, quem inopia et inertia
in eam sectam coniecerunt. Is confidentissime magistratui responsat non
aliter, ac si studio sibi duceret, in se iritare [!] sententiam suplicii [!].
Conspiratio longe maxima est adversus legitimum magistratum, ministros
verbi, scripturae autoritatem et Christum ipsum, cuius meritum
aperte pernegant. Exemplo, inquiunt, suo preivit, quo nos ad malorum
tolerantiam roboraremur, adeoque nihil acceptum ferunt Christo,
quam vitę normam; scripturas exaltatum Christum praedicantes nihil
morantur, irrident, cavillo frigido eludunt, plerumque autem hoc epiphonemate:

--172--

"putas spiritum meum adstringi debere modulo Pauli [1. Cor.
14. 32]?! Nolo ferre praeiudicium, quod autoritate Pauli aut mortuę
literę minitaris." Interea quosdam habent innocentes, plerosque fucos
tamen et pestilentissimos impostores, qui se personata quadam sanctimonia
vitę vulgo vehementer obtruserunt, et tamen non obscure promicant
asini aures, sub leonis exuvio tectę. Fures, adulteros, seditiosos
et id genus omnes fratrum loco habent, modo maledicere Christo et
nobis ausint, quum in reliquis non adeo conveniant. Pridem misi
articulos Cucii, quos ille a Denckio et Hezero tuo hausit. Wormatia
prorsus abdicavit verbum regni, consensu publico. Tantas turbas
Hetzerus praecipue dedit, et egregium istud facinus nostri baptistę
laudibus vehunt. Hoc est eis studium, ut evertant, quicquid
Christi superest. Cur igitur vicissim, ut hostes capitales non arceremus
a caulis ovium nostrarum? Quare in hoc toti sumus, ut suis
coloribus ecclesię depingantur, ad quam rem opus esset, ut per aliquem
ex tuis nobis describendum curares, quid in ista vestra vicinia
insidiarum ac doli instituerint. Te enim nugis eiusmodi degravare nolo.
Vale felicissime.
Nono Iulii anno 1527.
Capito.
Charissimo suo Huldericho Zwinglio Tigurino. - Zürich.