636

<< Nr. 635 | Index | Nr. 637 >> 

Absender: Oecolampad, Johannes

Empfänger: Zwingli

Ort: (Basel)
Datierung: 19 VII (1527)

Vorlage: Huldreich Zwinglis sämtliche Werke, vol. 9 (Leipzig: Heinsius, 1925) (Corpus Reformatorum 96), 176-178

--176--

Gratia Christi tecum.
Per Chartandrum scripsi, mi frater, quam sim perplexo animo
ancipitisque consilii, quidnam faciendum sit cum disputatione Badensi.
Expecto autem adhuc consilium tuum idque velim mature
scire. Senatus noster qualis sit, non ignoras. Inconsultus ęgre fert,
consultus non connivebit. Dixi Franciscano viam, qua parcatur
Helvetiis et episcopis fabaque in Eccios et Fabros et id genus
monstra cudatur. Brevi igitur rescribe. Negari non potest exemplaria
magna incuria excusa et confusiora, sed periculosa falsatio et depravatio
non statim deprehendi poterit. Si iubes, scribam; quomodo
autem iubebis, qui nondum legeris? Verum est, horę melius collocari
possent; sed cognoscere adversariorum fraudes secum nonnihil commodi
affert.
De libellis Baltassari nemo commonefecerat tibi mittendis.
Iam olim quendam miseram. Duos ego impressos accepi. Alterum
mitto, alterum apud me retineo, quandoquidem contra dialogum

--177--

olim in ędibus meis habitum scriptus est et par est, ut illi
respondeam, id quod et statui, ut technę impostorum detegantur. In
eo libro mihi impingit falso, quod negem originale peccatum in pueris,
dicitque, quod non ex me loquar, sed ex te, magistro in Tiguro.
Tibi vero quatuor errores impingit: primum, quod defendas impium
(ut vocat) baptismum puerorum calamo, doctrina et carnifice contra
agnitam veritatem. Et quia defendis hęc non vera, puniat te deus
alio errore, in quem cadis, et manifeste pronuncies originale peccatum
non esse peccatum. Quod quum tibi per doctum Urbanum Regium,
doctorem, copiosis tetimoniis scripturarum ad Rho. 7. [Röm. 7. 8ff.]
et aliis commonstratum, statim cadas et in tercium errorem, et scribas
Paulum non proprie et apposite (artlich) de peccato loquutum,
sed te proprie loqui, perinde ac Paulus non esset loquutus ex spiritu
sancto, et ignorasset, quidnam sit peccatum! Demum ex illo errore
ruas mox in quartum et immundo ore dicas: deum omnipotentem,
summum opificem, mulierem Evam ex costa dormientis Adę sub inauspicato
signo formasse. Hi sunt quatuor grandes et intolerabiles
errores, quos tu publice edendo dissemines in epistola "De peccato
originali" ad Urbanum Regium. Ita evenire solet, ut defendentes
unum non verum deus permittat in alia quoque cadere. Orat denique,
ut deus has blasphemias tibi agnoscendas concedat teque misericorditer
erigat tam graviter lapsum. Tantum habet dialogus, quod ad
te attinet. Alias totus in nos fabricatus est, taxans nos eodem candore,
quo et te. Alibi iterum de me dicit, quod probem baptismum
puerorum ex Exodo, sicut tu ,est' tuum pro ,significat' ex Genesi
[1. Mos. 41. 2ff.]. Alias tui non meminit. Itaque illum libellum apud
me retineo, nisi denuo postularis.
Fama hic est Franciscum Kolbium, quia nullum adhuc illi
constitutum stipendium, cogitare, ut a Bernatibus ad alios, nescio

--178--

quos, se convertat. Tu illum scriptis tuis fac retineas. Scribam
etiam ego.
Vale. 19. Iulii 1527.
Oecolampadius tuus.
Huldrico Zwinglio, suo charissimo fratri.